Buryn 20 aılyq eseptik kórsetkishten asqan qaryzy bar adamdar shetelge shyǵa almaıtyn. Bıyl bereshek somasy ózgerdi.
Endi 40 AEK nemese 116 680 teńge jáne odan kóp qaryzy bar adamdar boryshkerler tizimine kiredi, dep habarlaıdy Almaty-akshamy.kz
«Aı saıynǵy tólemderden qashyp júrgen adamǵa da shetelge shyǵýǵa tyıym salynady. Bul jerde men alımentti meńzep turmyn. Eger adam alımentti úsh aıdan kóp ýaqyt tólemese, ol shetelge shyǵa almaıdy», – dedi Qarjy mınıstrliginiń baspasóz hatshysy Álibek Ábdilov.
Onyń aıtýynsha, bireýdiń densaýlyǵyna zıan keltirip, ótemaqydan jaltaryp júrgender de «qara tizimge» ilinedi. Buǵan otbasyndaǵy asyraýshynyń qazasyna baılanysty keltirilgen zıan, múliktik, moraldyq zıandy óteý de jatady.
Iaǵnı, salyq, aıyppul boıynsha memleketke nemese sotqa júgingen basqa da adamdarǵa qaryzy bar qazaqstandyqtar shekaradan ári asa almaıdy.
«Basqa elge jınalǵan adam óziniń qaryzy baryn bilmeýi múmkin. Ushaqqa bılet satyp alady, reıske tirkeledi, júgin tapsyryp, shekaralyq baqylaýǵa kelgende, bir-aq biledi. Aty-jóni shetelge shyǵýǵa tyıym salynǵan boryshkerler tizimine engen. Al elden shyǵýǵa tosqaýyl bolatyn bereshek qataryna ne jatady? Olar salyq, alıment, komýnaldyq qyzmet, shaǵyn nesıe, basqa da jeke tulǵalar aldyndaǵy boryshtar jáne aıyppul», – dedi Ábdilov.
Sondaı-aq, mınıstrlik ókili qazaqstandyqtarǵa qaryzynyń bar-joǵyn oryndaýshynyń eskertýin kútpeı-aq, óz betinshe tekserip turýǵa keńes berdi.