Qazaqstan óz damýynda keshendi reformalar arqyly saıası, ekonomıkalyq jáne áleýmettik salalaryn jan-jaqty jetildirýdiń aýqymdy prosesin júzege asyrýda.
Elimizdiń Prezıdenti Qasym-Jomart Toqaev birneshe jyldyń barysynda aýqymdy ózgeristerdi iske asyryp keledi. Olardyń barlyǵy qoǵamda jınaqtalǵan túıtkildi problemalardy, azamattardyń kóterip júrgen ózekti máselelerin sheshýge, halyqtyń múddesin qorǵaýdy nyǵaıtýǵa, ádilettilik prınsıpteriniń myzǵymastyǵyn qamtamasyz etýge jáne otandastarymyzdyń ómir sapasyn jaqsartýǵa baǵyttalǵan. Bul prosester Memleket basshysy ózi bastama kóterip usynǵan «Halyq únine qulaq asatyn memleket» prınsıpiniń jan-jaqty oryndalyp kele jatqandyǵynyń aıqyn kórinisi dep bilemin.
Halyqqa arnalǵan qyrkúıek aıyndaǵy Joldaýda elimizdiń modernızasıasy óziniń jalǵasyn tapty. Prezıdenttik merzimdi eki merzimnen bir merzimge qysqartyp, jeti jyldyq kólemde bekitý usynyldy. Bul memleketimizdegi saıası áralýandyqtyń nyǵaıýy men demokratıa prınsıpteriniń keńeıýi dep esepteımin.
Osymen birge Qazaqstan tarıhynda alǵash ret saılaýdyń aldyn ala jarıalaný faktisiniń kýágeri boldyq. Prezıdent bir aı buryn saılaý prosesteriniń bastalýyn jarıa etti. Atalmysh usynystyń eldegi saıası uıymdardyń jumysyn josparly uıymdastyrýǵa negiz bolatynyn otandyq sarapshylarmen qatar, sheteldik saıasatkerler men kásibı mamandar da atap ótti.
Qazir álemdegi geosaıası ahýal asa kúrdeli, bizdiń óńirimizdegi jaǵdaı da alańdaýshylyq týdyrady. Osy maqsatta Qazaqstan ishindegi turaqtylyqty nyǵaıtý strategıalyq mańyzǵa ıe.
Elimizdegi saıası júıe tolyǵymen jańǵyrýy qajet. Osy maqsatta kezekten tys Prezıdent saılaýy 20 qarashaǵa belgilenip, Májilis pen barlyq deńgeıdegi máslıhattar saılaýlary kelesi jyldyń birinshi jartyjyldyǵyna josparlanýda.
Qazaqstan qoǵamy ishki prosesterin beriktendirip, aldaǵy damýdyń nyq alǵysharttaryn qalyptastyrýda.