2023 oqý jylynyń jaýyngerlik daıyndyq josparyna sáıkes elimizdiń Qurlyq áskerleri men Desanttyq-shabýyldaý áskerleri bólimsheleri arasynda «Mergender batalóny» jarysy ótti.
Qarýly Kúshterdiń polıgondary men oqý ortalyqtarynda merzimdi qyzmettegi áskerı qyzmetshilerdi qosa alǵanda, bólimshelerdiń jeke quramy shtattyq qarý-jaraq pen atys qarýynan baqylaý jáne oqý atý jattyǵýlaryn, sondaı-aq atys daıarlyǵy men áskerı topografıa normatıvterin oryndady, dep habarlaıdy Almaty-akshamy.kz Elorda.info saıtyna silteme jasap.
Jeńimpazdar eki nomınasıa boıynsha anyqtaldy. Onyń birinshisi mehanıkalandyrylǵan, tank, desanttyq-shabýyldaý, shabýyldaý, teńiz jaıaý áskeri quramalarynyń motoatqyshtar, desanttyq-shabýyldaý mehanıkalandyrylǵan, tank, jáne shabýyldaý batalóndarynyń, ekinshisi mehanıkalandyrylǵan, tank, shabýyldaý jáne teńiz jaıaý áskeri quramalarynyń tank batalóndarynyń arasynda ótti.
Jarys qorytyndysy boıynsha motoatqyshtar (desanttyq-shabýyldaý) batalóndary arasynda birinshi oryndy Óskemen garnızonynyń 2 motoatqyshtar batalóny, ekinshi oryndy Qaraǵandy garnızonynyń 1 motoatqyshtar batalóny, úshinshi oryndy Qonaev garnızonynyń 2 desanttyq-shabýyldaý batalóny ıelendi.
Tank batalóndary arasynda birinshi oryndy Aqtaý garnızonynyń teńiz jaıaý áskerleri brıgadasynyń tank batalóny, ekinshi oryndy Aıagóz garnızonynyń 1 tank batalóny, úshinshi oryndy Shymkent garnızonynyń tank batalóny ıelendi.
Quramynda áskerı basqarý organdarynyń, Qurlyq áskerleri men áskerı-oqý oryndarynyń tájirıbeli ofıserleri bolǵan tóreshiler alqasy bólimshe komandırleriniń keshendi atys mindetterin sheshý daǵdylaryn ıgerý deńgeıin jáne áskerı qyzmetshilerdiń dalalyq daǵdylaryn baǵalady.