Kúzben birge keletin qarttar kúni elimizde keńinen atalyp ótedi. Kóńilderi sál nársege jabyrqap qalatyn qarttarymyz da osy kúz mezgili sıaqty. Birde kúńirenip, qaıtyp kelmes jastyq shaqtaryn ańsasa, keıde balasha qýanyp kúzdiń qubylyp turatyn kúnderi sıaqty. Sol úshin olar jyly sózge, áńgimesin tyńdar qulaqqa zárý. Qal-jaǵdaıy men densaýlyǵyn suraǵanǵa qýanyp, qatarlastarymen sóılesse bir jasaryp jasap qalatyn jandary aıaýly jandar.
Aqyldyń keni bolǵan qarıalardyń ómirde kórgeni de, ómirden túıgeni de, berer aqyl-keńesi de mol. Qazaq úlkendi syılap, reti kelse, batasyn alýǵa tyrysatyn halyq. «Qarty bar úıdiń qazynasy bar», «Atańa ne isteseń, aldyńa sol keler», «Kúlseń, kárige kúl» degen qanatty sózderdiń el arasynan keńinen tanylýynyń ózi kóńilderi darıadaı qarıalarǵa degen qurmetten shyqsa kerek.
Búgin - Halyqaralyq qarttar kúni. Kópti kórgen aqsaqaldarymyz ben aq samaıly ájelerimizge osy kúni qandaı qurmet-qoshemet kórsetse de artyq emes. Tipti kúnde úılerińizdegi qazynalaryńyzdyń áńgimesin tyńdap, aıtqan aqylyna bas ızeı salsańyz, rızashylyǵyn alasyz. Dana qarıalarymyz kóp nársege muńaıyp, ýaıymǵa salyna bermes úshin, olarǵa da bala sıaqty qarap, kóńilderin aýlaıyq! Kóshede jasy egde tartqan adam kórsek, jol bereıik, jolyn kes-kestemeıik! Avtobýsta oryn bereıik! Jyly sóz aıtyp, júzderine meıirimmen qarap, kóńilderin aýlap qoıaıyq! Aqyl aıtsa, ózimsinip sóz qaıtarmaı, «jaraıdy» dep bas ızeıik! Alysta bolsyn, jaqynda bolsyn, ata-ájelerimizge habarlasyp, amandyǵyn bilip, olardyń kerek ekendikterin sezindire bileıik! Sebebi olar qaı jerde júrse de, eli men urpaǵynyń amandyǵyn tilep otyrady. Qazynalarymyzǵa qandaı qurmet kórsetsek te artyq emes. Ózimizdiń de bir kúni jastyq ketip, kárilikke jetetinimizdi oılap qoıaıyq.
Jastyq óter, kárilik jeter. Sondyqtan atamyzǵa ne istesek, aldymyzǵa sol keletinin esten shyǵarmaıyq.