Prezıdent Qarjylyq monıtorıń agenttiginiń tóraǵasy Janat Elımanovty qabyldady
Memleket basshysyna 300 qylmystyq isti tergep-tekserý aıaqtalǵany jóninde baıandaldy. Zardap shekken azamattarǵa 20 mıllıard teńgege jýyq ótemaqy qaıtaryldy, dep habarlaıdy aqshamnews.kz.
Qarjy pıramıdalaryn uıymdastyrýshylardyń 2,2 mıllıard teńge bolatyn krıptovalúta túrindegi qylmystyq tabystary buǵattaldy. Uıymdasqan 6 qylmystyq top joıylǵan. Olardyń biri – transulttyq top. İri ınfraqurylymdyq jobalardy iske asyrýda 23 mıllıard teńge kólemindegi búdjet qarjysynyń maqsatsyz jumsalýyna jol berilmedi.
Prezıdentke aǵash pen temirdiń zańsyz eksporttarynyń joly kesilgeni týraly baıandaldy. Sondaı-aq janar-jaǵarmaıdy zańsyz tasymaldaýdyń iri sqemasy joıylǵany jaıynda aıtyldy. Bul ishki naryqtaǵy jaǵdaıdy turaqtandyrýǵa múmkindik berdi.
Janat Elımanov azamattardy qarjy alaıaqtarynan qorǵaý, qaryz júktemesin azaıtý boıynsha qabyldanyp jatqan sharalar týraly málimdedi. Zańsyz jumys istegen shaǵyn qarjy uıymdarynyń jelisi anyqtaldy. Olardan 327 myń azamat zardap shekken. Keltirilgen zalal mólsheri 30 mıllıard teńgeni quraıdy. 24 qarjy pıramıdasy joıyldy. Aldyn alý maqsatynda alaıaqtyq sqemalardy taratqan 5,6 myń saıt buǵattalyp, 22 myńnan astam múshesi bar 30 toptyq chat pen akkaýnt jabylǵan.
Qasym-Jomart Toqaevqa jastardy qylmystyq sqemalarǵa tartýdyń aldyn alý úshin júrgizilip jatqan profılaktıkalyq sharalar jóninde aqparat berildi. Atap aıtqanda, 2,8 myń oqý ornyndaǵy 567 myń oqýshyǵa qarjylyq qaýipsizdik boıynsha sabaqtar ótkizilgen. Mundaı jumystar 100 joǵary oqý ornynda júrgizilip, 100 myńnan astam stýdentti qamtyǵan.
Budan bólek, Janat Elımanov Parlament Májilisiniń qaraýyna kiristerdi jylystatýǵa qarsy kúres máseleleri boıynsha zańnamalyq túzetýler engizilgenin habarlady. Olar qabyldansa, Qazaqstan FATF standarttaryna tehnıkalyq turǵydan tolyq saı keledi.
Memleket basshysy ekonomıkalyq quqyq buzýshylyqtyń aldyn alýdy, kóleńkeli aınalymnyń úlesin azaıtýdy, zańsyz ıelengen aktıvterdi jylystatýǵa qarsy kúresti jalǵastyrýdy, sondaı-aq halyqtyń qarjylyq saýatyn arttyrýdy tapsyrdy.