Almatydaǵy jańa medısına ortalyǵy: Qarasý jáne Ójet shaǵyn aýdandarynyń 20 myńnan astam turǵyny qadamdyq qoljetimdilikte medısınalyq kómek ala alady
Almaty ákimi Erbolat Dosaev Alataý aýdanyna jasaǵan jumys sapary barysynda Qarasý shaǵyn aýdanyndaǵy medısınalyq-sanıtarlyq kómek ortalyǵynyń (MSAK) jańa ǵımaratyna bardy, dep habarlaıdy aqshamnews.kz
Buǵan deıin Qarasý shaǵyn aýdanyndaǵy 18 myńnan astam turǵynǵa medısınalyq kómek 160 sharshy metrlik №21 emhana fılıalynda kórsetilip kelgen. Al shamamen 24 myń adam turatyn Ójet shaǵyn aýdanynyń turǵyndaryna №25 qalalyq emhana qyzmet kórsetedi. Medısınalyq mekemelerdiń júktemesin azaıtý jáne Qarasý men Ójet turǵyndaryna sapaly medısınalyq qyzmet kórsetý maqsatynda qadamdyq qoljetimdi jerde zamanaýı dárigerlik ambýlatorıa salý qajettiligi týyndady.
Turǵyndardyń ótinishin eskere otyryp, ákimniń tapsyrmasymen jańa ortalyqtyń qurylysy 2023 jyldyń aqpan aıynda bastaldy. Qazirgi tańda qurylys jumystary tolyǵymen aıaqtalǵan. Bıylǵy jyldyń qarasha aıynyń sońyna deıin ǵımaratty paıdalanýǵa berý jáne ony qalalyq qoǵamdyq densaýlyq saqtaý basqarmasynyń balansyna ótkizý josparlanǵan. Tıisti ruqsat qujattaryn, sonyń ishinde qyzmet kórsetý lısenzıasyn alǵannan keıin MSAK ortalyǵy alǵashqy pasıentterdi qabyldaı bastaıdy. Almaty qalasy qoǵamdyq densaýlyq saqtaý basqarmasy basshysynyń mindetin atqarýshy Nazgúl Imanǵalıevanyń aıtýynsha, ortalyqty ashý osy jyldyń jeltoqsan aıyna josparlanǵan.
Bes qabatty jańa medısınalyq-sanıtarlyq alǵashqy kómek kórsetý ortalyǵy №25 qalalyq emhananyń fılıaly bolyp tabylady jáne Qarasý men Ójet shaǵyn aýdandarynyń shamamen 20 myń turǵynyna qyzmet kórsetedi. Jobalyq qýaty – bir aýysymda 200 adam qabyldaý. Jańa ǵımaratta tórt bólimshe bar: ýchaskelik qyzmet, mamandandyrylǵan medısınalyq kómek bólimi, gınekologıa, klınıkalyq-dıagnostıkalyq bólimshe. Ortalyq ÝDZ, rentgen, aýdıogramma, spırografıa, kolposkopıa, EKG sıaqty zamanaýı jabdyqtarmen qamtamasyz etilgen.
Jańa medısınalyq mekemeniń ashylýy №25 jáne №21 emhanalardaǵy júktemeni azaıtýǵa múmkindik beredi, ári turǵyndar qajetti kómekti zamanaýı jáne yńǵaıly medısınalyq mekemede jyldam ala alady.
2024 jyldyń basynan bastap Almatyda úsh otbasylyq-dárigerlik ambýlatorıa paıdalanýǵa berildi. Olar aýysymyna 100 adam qabyldaıtyn Nurshashqan shaǵyn aýdanynda, bir aýysymda 200 adam qabyldaıtyn Mamyr shaǵyn aýdanynda jáne aýysymyna 200 adam qabyldaıtyn Kemel shaǵyn aýdanynda ornalasqan.
