Ákimniń baqylaýynda: Almatyda sýmen jabdyqtaýdyń kópjyldyq problemasy qalaı sheshilýde
Almaty ákimi Erbolat Dosaev Alataý aýdanyna jumys sapary Boraldaı shaǵyn aýdanyndaǵy sýmen jabdyqtaý jáne káriz jelileri qurylysynyń barysymen tanysty, dep habarlaıdy aqshamnews.kz
2014 jyly qalaǵa qosylǵan shaǵyn aýdanda ınjenerlik jeliler bolǵan joq. 2019 jyly tek 8,2 km magıstraldyq jeliler salyndy. Osy jyldyń qyrkúıek aıynda qala basshysynyń tapsyrmasy boıynsha 76,4 km jeli, onyń ishinde 52,1 km – sý qubyry jáne 24,3 km – káriz qurylysyn kózdeıtin aýqymdy joba bastaldy. Osylaısha, Alataý aýdany ákimdiginiń málimeti boıynsha Boraldaı shaǵyn aýdanynyń 4 myńnan astam turǵyny ortalyq komýnıkasıalarmen qamtylatyn bolady.
Búgingi tańda 7 km jeli salyndy. Nysandardyń qurylysyn aıaqtaý jáne paıdalanýǵa berý 2025 jyldyń qazan aıyna josparlanyp otyr.
Erbolat Dosaev Alataý aýdanynyń ákimine jumystardy oryndaý kestesi men sapasyn baqylaýda ustaýdy tapsyrdy. Qala basshysy joba belgilengen merzimde aıaqtalyp, barlyq standarttarǵa saı bolýy tıis ekenin atap ótti, óıtkeni sýmen jabdyqtaý jáne káriz júıesi jaıly jáne qaýipsiz turýdyń negizi bolyp tabylady.
Esterińizge sala keteıik, Almatyda ınjenerlik ınfraqurylymdy jańǵyrtý jumystary belsendi júrgizilýde. Osy jyldyń 9 aıynda 219 km jańa sýmen jabdyqtaý jáne sý burý jelileri salyndy, 27,3 km qoldanystaǵy jeliler jańǵyrtyldy. 2025 jyly taǵy 240 km qurylys jáne 48 km jelini jańǵyrtý josparlanǵan.
Osylaısha, 100 myńǵa jýyq qala turǵyny úshin qabyldanǵan sharalar kesheniniń arqasynda ınjenerlik jelilerdiń joǵary tozýyna baılanysty sýmen jabdyqtaý men sý burýdyń kópjyldyq problemasy sheshiletin bolady.