Almaty ákimi Erbolat Dosaev jumys sapary barysynda Alataý aýdanyndaǵy 2 000 oryndy jaıly mekteptiń qurylysymen tanysty, dep habarlaıdy aqshamnews.kz
Bul bilim mekemesiniń qurylysy ótken jyly naýryz aıynda «Jaıly mektep» ulttyq jobasy aıasynda Terekti shaǵyn aýdanynda bastalǵan bolatyn.
Alataý aýdanynda qazir 31 memlekettik mektep bar, onda 58 myńnan astam bala oqıdy. Halyq sanynyń artýy men belsendi qurylys júrgizý nátıjesinde osy oqý jylynda aýdan boıynsha mektep oryndarynyń tapshylyǵy 5 myń orynǵa deıin jetti. Qalada «Jaıly mektep» jobasy boıynsha 36 800 oryndy 22 bilim ordasynyń qurylysyn salý josparlanǵan.
Almaty ákimdigi oqýshy oryndarynyń tapshylyǵynyń deńgeıin retteý maqsatynda jańa mektepter men qosymsha qurylystardy jergilikti búdjet esebinen salýdy jalǵastyrady. Qaladaǵy buryn ashylǵan bilim uıymdaryna baılanysty 2025 jyly taǵy 16 mektep bir aýysymdyq oqytýǵa kóshedi. Osylaısha, kelesi oqý jylynda 200-den astam memlekettik mekteptiń 43-i bir aýysymdyq júıege kóshedi (ósim 12,5%-dan 18,4%-ǵa deıin).
Terekti shaǵyn aýdanyndaǵy jaıly mektepti kórip shyqqan soń Erbolat Dosaev ony 2025 jyly qańtarda, úshinshi toqsannyń basyna deıin ashýdy tapsyrdy.
Aıta keteıik, mektep qurylysymen qatar trotýarlar, jaryqtandyrý jáne jol belgilerin ornatý jumystary qolǵa alynǵan. Bul jumystar osy aıdyń sońyna deıin aıaqtalmaq. Sonymen qatar, Almatynyń qalalyq mobıldilik basqarmasy mektepke aparatyn 1,1 km joldy salyp bitirdi.