Aýyl sharýashylyǵy mınıstri Erbol Qarashókeev Senatta ótken Úkimet saǵatynda jún óńdeý salasynyń problemalary týraly aıtty, dep habarlaıdy Almaty-akshamy.kz Azattyq Ruhy-na silteme jasap.
«Jún óńdeýdegi problemalar teri óńdeý problemalaryna uqsas - shıkizat sapasynyń tómendigi. Respýblıkada jyl saıyn 40 myń tonnaǵa jýyq qoı júni óndiriledi, onyń tek 33% nemese 13,3 myń tonnasyn óńdeýge paıdalanýǵa bolady. Júnniń 67%-y qylshyq jáne jartylaı qylshyqty jún, ol is júzinde óńdelmeıdi jáne toqyma ónerkásibinde suranysy joq. Kıiz jáne kıizden jasalǵan aıaq kıim fabrıkalary az ǵana bóligin óńdeıdi. Bıylǵy aqpan aıynda Aýyl sharýashylyǵy mınıstrligi júndi eksporttaýǵa kedendik bajdardy alyp tastaýǵa bastamashylyq jasady», - dedi Qarashókeev.
Ol ataǵandaı, jún óńdeý úlesiniń tómen bolý máselesiniń sheshimi qylshyqty jáne jartylaı qylshyqty júndi óńdeıtin kásiporyndar qurý.
«Máselen, Aqtóbe oblysynda qýattylyǵy jylyna 2,1 myń tonnalyq qylshyqty júndi óńdeıtin «QAZFILTEK» JSHS ınvestısıalyq jobasyn iske qosý josparlanýda, ol jylý oqshaýlaǵysh materıaldardy daıyndaý úshin paıdalanatyn bolady. Jobany yntalandyrý úshin ınvestısıalyq sýbsıdıalaý qaǵıdalaryna ınvestısıalyq salymdardyń 25%-yn óteý úlesi bar júndi óńdeý jónindegi pasport engizilgen», - dedi ol.
Mınıstr ataǵandaı, Batys Qazaqstan agrarlyq ýnıversıtetiniń ǵalymdary jylyjaılar úshin gıdroponıka retinde qylshyqty jáne jartylaı qylshyqty júndi paıdalaný tehnologıasyn ázirleý boıynsha zertteýler júrgizýde.
«Zertteýdiń qorytyndysy boıynsha tehnologıalardy ónerkásiptik óndiriske berý josparlanýda.Nátıjesinde qylshyqty jáne jartylaı qylshyqty júnge ishki naryqta suranysty týdyrýǵa jáne daıyn ónim túrinde eksportqa shyǵarý múmkindigi josparlanyp otyr», - dedi ol.