Prezıdenttikke kandıdat Qaraqat Ábdenniń Túrkistan oblysyndaǵy saılaýaldy sapary jalǵasýda.
Búgin ol Túrkistan qalasynyń jurtshylyǵymen júzdesip, óziniń saılaýaldy baǵdarlamasyn tanystyrdy. Kezdesý barysynda qoǵamdaǵy ózekti suraqtar men týrızm salasyn damytý máseleleri talqylandy, dep habarlaıdy Almaty-akshamy.kz.
Q.Ábden atap ótkendeı, tarıhı-mádenı eskertkishter men mádenı mura nysandary kóp shoǵyrlanǵan Túrkistan shaharynyń týrızmdi damytýda áleýeti zor.
«Túrkistan – barsha túrki halyqtaryna ortaq, álemge áıgili qasıetti jer. Ejelden-aq «ekinshi Mekke» dep atanyp ketken qazaqtyń rýhanı astanasy kóptegen saıahattaýshylardyń qyzyǵýshylyǵyna ıe bolyp otyr. Túrkistannyń tarıhı mańyzyn jáne osy óńirde shoǵyrlanǵan kıeli jerlerdiń kóp ekendigin eskere kele, alkogóldi ishimdikterdi satýdan bas tartqan alǵashqy qalalardyń biri atanýyna barlyq múmkindikter bar», - dedi Q.Ábden.
Kezdesýge sondaı-aq óńirlik týrızm salasynyń ókilderi qatysyp, bul baǵyttyń ózekti suraqtaryn ortaǵa saldy.
«Bizge shetelden kóp týrıser keledi, biraq ishki týrızm naryǵyn da damytý kerek. Bul salada biz tarıhı jáne ulttyq qundylyqtarǵa kóp kóńil bólip júrgen kandıdattyń baǵytyn qoldaımyz. Budan bólek, aımaqtyń ınfraqurylymyn da nazardan tys qaldyrmaǵan jón», - dep bólisti týrısik kompanıanyń ókili Móldir Málibekova.
Eske salsaq, elimizde 20 qarasha kúni kezekten tys prezıdent saılaýy ótedi. Kandıdat Q.Ábden el aımaqtaryn aralap, 9 oblysta 30-dan astam kezdesý ótkizdi. Aldaǵy ýaqytta ol Jambyl oblysy saılaýshylarymen júzdesedi.