«Qaramaı daýyldarǵa, jaýyndarǵa...»

nemese bıik-bıik ǵımarattar salyp júrgen qurylysshy ómirinen birer sóz

Kez kelgen eldiń áleýmettik áleýeti onyń qurylys salasynyń damýyna tikeleı baılanysty. Bizdiń otandyq qurylys ındýstrıasynda jyljymaıtyn múlik naryǵynyń kóshbasshysy bolyp tanylǵan BI Group – iri ınovasıalyq qurylys holdıńi. Atalǵan irgeli holdıńte joǵary bilikti 5000-ǵa jýyq qyzmetker jumys isteıdi. Olardyń sapynda bizdiń búgingi keıipkerimiz, ınjener- qurylysshy, «Qazaqstannyń qurmetti qurylysshysy» tósbelgisiniń ıegeri Bolat Tuńǵyshbekov te bar.

Osynaý mártebeli mamandyq­tyń júgin 38 jyldan beri kóterip kele jatqan Bolat Qosaquly áý basta qurylysshy bolýdy emes, zańgerlik jolǵa túsýdi armandaǵan bolatyn. Týmysynan shynshyl, ádil, adaldyqty súıetin, ornyqty minezdi, bir sózdi, ótirikke jany qas azamattyń bitim-bolmysy da bul salaǵa jat emes-tin.

Qazaq ulttyq ýnıversıtetiniń Zań fakúltetinde oqýdy qatty ar­mandaıtyn. Biraq úıdiń kenjesi bolǵasyn, ata-anasy ony alysqa, Almatyǵa jibergisi kelmedi. Son­dyqtan týǵan elde qalyp, sol tusta Shymkentte eń yqpaldy oqý orny sanalǵan Qazaq hımıa-tehnologıa­lyq ınstıtýtyna oqýǵa túsip, «Ónerkásiptik jáne azamattyq qu­rylys» mamandyǵyn úzdik belgimen támamdap shyqty. Alǵash­qy eńbek jolyn týǵan jerinde bastady. Eki jyl jumysshy boldy. Odan iskerligin, sheberligin baǵala­ǵan basshylyq master, sosyn pro­rab qyzmetine kóterdi.

Birde qaladaǵy turǵyn úı­lerdiń biriniń janynan ótip bara jatyr edi, aýladaǵy qumnyń ústin­de súıkimdi baldyrǵandar bir-biri­ne byldyrlaı sóılep, oıynshyqta­rymen shat-shadyman kúıde máz bolyp oınap otyr eken. Sonadaıda balalaryna qaraılap, bir-birimen shúıirkelesip analary, ájeleri otyr. Sol sátte jas qurylysshy­nyń keýdesin maqtanysh kernegeni bar. «Bul biz salǵan, bizdiń qoly­myzdyń taby qalǵan úı ǵoı, úlken­ge de, kishige de jaıly bolǵanyn kórgen qandaı ǵanıbet!» dep kúbir­legen ishteı sonda. Shyny kerek, óz mamandyǵynyń ǵajaptyǵyn da sol kezde moıyndaǵan. Bizdiń keıip­kerimiz sol bir áserli sátten bastap ózin basqa salada elestetken emes.

MÁRTEBELİ MAMANDYQ

Odan keıingi iri jobalardy qolǵa alǵan sáti 2005 jyly Alma­tyǵa qonys aýdarǵanda, «Aısel Qazaqstan korporasıasy» JSHS- de ýchaske basshysynan bastaldy. Qazirgi kúni «Almaty qalasynyń Alataý aýdanyndaǵy Inovasıa­lyq shyǵarmashylyq ortalyǵy» jobasynyń (BI GLOBAL JSHS) ýchaske basshysy. Atalǵan joba, ıaǵnı zamanaýı Oqýshylar saraıy jaqyn arada balalar ıgiligine beri­ledi. Jańa ǵımarattyń tusaýkeser toıy taıaý degen sóz. Buǵan deıin ınjener-qurylysshy Bolat Tuńǵyshbekovtyń tikeleı atsalysýymen megapolıstegi «Alataý» em­deý-saýyqtyrý kesheni, «Qaıta jańartylǵan Teleortalyq», «Qal­qaman» yqshamaýdanyndaǵy 1800 oryndy mektep paıdalanýǵa beril­gen bolatyn.

– Mamandyq tańdaý – oqý, dıp­lom alý ǵana emes, ol – ómir jo­lyńdy durys tańdaý degen sóz. Sondyqtan mamandyqty tańdaýda qatelespegen durys. Mamandyǵyń­dy rıasyz súıý kerek, sonda jetistikke jetesiń. Qazirgi jastar­ǵa jıi aıtyp otyratyn sózim osy. Iaǵnı durys tańdalǵan mamandyq ıesi qashanda óz isiniń sheberi, ári bilgiri bolyp, suranysqa ıe bolyp jatady. Ol óz tańdaǵan baǵytyn jaqsy kórip, sol salanyń maqtany­shyna aınala alady. Bizdiń holdıń jas mamandarǵa jaǵdaı jasap oty­rady. Biz jaqsy kadrlardy óz ishimizde tárbıelep, kásiptik baǵdar berip, jetildirip, bıikke shyǵaryp otyramyz. Al jaqsy maman – jaq­sy jumystyń kepili, – deıdi Bolat Qosaquly.

Qurylysshy mamandyǵynyń qıyndyǵy sol, olar nusqaý berip jyly kabınette otyrmaıdy, jyl­dyń tórt mezgilinde de syrtta, da­lada, shilińgir shildeniń aptap ys­tyǵynda, tópeleı quıǵan jańbyrdyń astynda, jeldiń ótin­de, aq qar, kók muzda aıaqtan sýyq ótip nemese shań-tozań jutyp, ju­mystyń minsiz, sapaly bolýy úshin qas qaraıǵansha qurylys basynda júredi. Al biraq neshe kún, neshe tún, qanshama aılar uıyqtamaı jasalǵan jumys aıaqtalyp, kóz al­darynda appaq, eńseli ǵımarat jarqyrap shyǵa kelgende, qınalǵan kúnderiniń bári de umytylyp qala­tyny bar. Bul – bizdiń keıip­kerimizdiń rıasyz sózi. Iá, olar árdaıym adamdardyń ıgiligi úshin qyzmet etip jatqanyn maqtan etedi. Qurylys alańynda ter tókken qu­rylysshylar – negizgi eńbek kúshi. Olar Almatyny túrlendirip, onyń jańa kelbetin qalyptastyrýda eren eńbek sińirip júr.

«AT TUIaǴYN TAI BASAR»

«At tuıaǵyn taı basar» demekshi, Bolat Qosaqulynyń uly Dıas ta maıtalman qurylysshy búginde. Áke ókshesin basyp, izin jalǵap kele jatqan urpaǵynyń bolashaǵynan kóp úmit kútedi. Kezinde ózi baptap, ózi jol kórsetip, tárbıelegen, osy mamandyqqa baýlyǵan ulynyń laýa­zymy qazir ákeden joǵary. Iaǵnı qurylys jobasy jetekshisiniń orynbasary. «Ákeden ul týsa ıgi, ákeniń jolyn qýsa ıgi» deıdi qazaq naqyly. Sondyqtan árıne, áke bıik­ke samǵaǵan ulynyń jetistigin as­qan maqtanyshpen aıtady.

Ózi de ákesinen kóp jaqsyny sińire bildi. Ákesi Qosaqtan eńbek­qorlyqty, qolǵa alǵan iske árda­ıym jaýapkershilikpen qaraýdy, otbasyna adal bolý syndy qasıet­terdi darytty. Al aıaýly anasy Uldanaıdyń kúnde dastarhan ba­synda aıtatyn «Baq, qaıda bara­syń?» dese, «Yntymaǵy jarasqan úıge baramyn» deıdi eken. Qulyn­darym, árdaıym baýyrmal, bir- birińmen yntymaqta bolyńdar» degen sózi júreginde máńgige jazy­lyp qalǵan. Meıirimge toly úni de kúni búgingideı qulaǵynda. Búginde sol sózderdi óz balalarynyń da júregine qondyrdy. Ul-qyzy, tipti nemereleri de bir-birine baýyrmal. Bolat Qosaquly bul sátterdi álemniń eshbir ǵalamatyna aıyr­bastamaq emes.

Aýylǵa, elge barǵanda atpal azamat ekenin bir sátke umytyp, anasynyń aldyna dál bala kúndegi­deı erkeleı jata qalatyn sátter de búginde saǵynyshqa aınalǵan. Elge baryp kelgen saıyn sheshesiniń ba­synan sıpaǵan alaqanynan keremet jylý alyp qaıtýshy edi. Sondyq­tan bolar, búginde óziniń jasy paıǵambar jasyna jetip qalsa da, áli kúnge aıaýly anasy eske túsken­de, keýdesin saǵynysh kernep, kózi balasha jasaýrap qalatyny bar.

BAQYT ÚIİ

Baılyq degen ol úshin aqsha eme s, densaýlyq, otbasynyń bútindigi, aǵaıyn-týystyń amandy­ǵy, qajet shaqta janyńnan tabyla­tyn jaqsy dos, mine, Bolat Qosaquly úshin baǵa jetpes baılyq osy qundylyqtar.

Ol árdaıym óz-ózine súıenip úırengen jan. «Jaqsy bolsa – ózimnen, jaman bolsa da – ózimnen» degen ustanymmen ómir súrip kele jatqan azamat. Áldebir máseleler­de ózgelerdiń de oı-pikirin tyńdaı­dy, zerdeleıdi, tarazylaıdy, biraq jeme-jemge kelgende óz ustany­mynda qalady. Osy oraıda Abaı­dyń «Ózińe sen, ózińdi alyp shyǵar, Eńbegiń men aqylyń eki jaqtap» degen sózi beıne ózine aıtylǵandaı.

Bizdiń keıipkerimiz jar tańdaýda da qatelespegenin aıtady. Jary Sara Úsenqyzy – farmasevt. Ekeýi úlken súıispenshilikpen otaý qur­ǵan. Jas otbasynyń aldynda eki tańdaý turdy: daıyn páterdi satyp alý nemese jer alyp, úı salý. Jas­tar sońǵysyn tańdady. Iaǵnı olar «Baqyt úıin» óz qoldarymen tur­ǵyzǵysy keldi. Jáne turǵyzdy. Kómekke, árıne, bir qursaqtan shyq­qan baýyrlary da keldi. Sol «Baqyt úıi» týǵan jerde áli tur, Almatyǵa kósherde satýǵa da qıǵan joq, baqyt­tyń máńgi bolǵany jaqsy ǵoı. Qazir baqyt, shattyq, qýanysh shaqyryp turatyn, báriniń basyn qosatyn sol úıde inileri turyp jatyr.

TELEFON

Búgingi ómirine esh ókpesi joq. Eger ǵaıyptan barlyq ómirin ba­synan qaıtadan súrý múmkindigi berilip jatsa, bir sátin de, bir pa­raǵyn da ózgertpesten, dál osy ómirin qaıta súrýge peıildi. Iá, keı-keıde júregin syzdatyp ótetin bir jaǵdaı bar. Kenje uly ómir­den erte, nebary 24 jasynda ótip ketti. Ondaı sátteri keýdesin muń kerneıtini bar. Biraq «Tuıaǵy bútin tulpar, qanaty bútin suńqar joq» dep óz-ózin jubatyp, boıyn tiktep ala qoıady.

Búginde uıaly telefon ómirimizdiń aınymas bólshegine aı­nalǵan. Barlyq jumysty da sol alaqandaı qurylǵymen-aq tyndyra beretin bolǵanbyz. Tipti, keıde ju­mysbastylyǵymyzdy syltaýratyp kóp nársege ýaqyt tappaı jatamyz. Biraq bizdiń keıipkerimiz balalary úshin árdaıym ýaqyt tabady. Ózimen bir sapta, ıyq túıistirip qatar júr­gen uly Dıaspen telefonmen kúnige birneshe márte sóılesedi. İstep júr­gen jumysy, salasy bir bolǵandyq­tan shyǵar, oı-pikirleri de kóbine bir arnada toǵysyp jatady. Búginde Túrkıada turyp jatqan qyzy Gúl­danasyna «áke» degen daýysyn estý, saǵynyshyn basý úshin jıi qońyraý soǵady. Árıne, osyndaı altyn asyqtaı ul men kúmis qasyqtaı qyz syılaǵan, 36 jyldan beri ystyq- sýyqqa birge tózip kele jatqan ja­ryna degen súıispenshiligi joǵary. Juma bastalǵan sátten kelinshegi tátti, dámdilerin qamdaı bastady. Sosyn «biz shyqtyq» dep telefon soǵady. Iá, senbi, jeksenbide neme­releri kelip, ata-ájeniń úıin shýaqqa toltyryp ketedi.

Al osyndaı baqyt qushaǵynda ómir súrip jatqan qurylysshynyń eńbektegi ár sáti, ár jumysy sátti bolmaýy tipti múmkin emes.

Shyqqan bıigińiz alasarmasyn, mártebeli qurylysshy!

 BI GROUP – Qazaqstannyń jyljymaıtyn múlik naryǵynyń kóshbasshysy

Bizdiń keıipkerimiz Bolat Tuńǵyshbekov eńbek etetin BI Group Qazaqstannyń jyljymaıtyn múlik naryǵynda 1995 jyldan beri jumys isteıdi jáne osy ýaqyt ishinde kásibı jáne senimdi seriktes degen atqa laıyqty boldy.

BI Group – búginde qurylys, development jáne ınjınırıń sıaqty ártúrli salalarda bólimsheler men dıreksıalardan qural­ǵan, qurylymy ártaraptandyrylǵan holdıń.

Holdıń jyldan-jylǵa damyp, qazaqstandyqtardy jumys oryndarymen qamtamasyz etip, Qazaqstan ekonomıkasynyń da­mýyna súbeli úlesin qosyp keledi.

BI Group barlyq deńgeılerde turǵyn úı salady. Qazaqstan aý­maǵynan tys jerlerde de qurylys salasyn damytýda. Halyqara­lyq munaı-gaz kompanıalary úshin asa kúrdeli jobalardy júzege asyrady jáne taıaý shetel naryqtaryn ıgerýde.

Qurylys salasyndaǵy aýqymdy memlekettik baǵdarlamalarǵa qatysady. Óz qyzmetkerleriniń kásibı turǵyda ósýine jáne olar­dyń turaqty oqýyna qolaıly jaǵdaı jasaıdy. Qaıyrymdylyq jobalarymen de alǵy shepte júrgen kompanıa.

Holdıń halyqaralyq qarjylyq ashyqtyq standarttaryn, bıznesti júrgizýdiń etıkalyq qaǵıdattaryn, komandalyq rýhty ustana otyryp, korporatıvtik basqarýdyń úzdik álemdik tájirı­belerine súıenedi.

Holdıń «Eń úzdigin tańda»: joba, komanda, tehnologıa, me­nedjment» qaǵıdaty boıynsha jumys isteıdi. BI Group-tyń 100-den astam basshysy MBA dárejesin ıelengen.