Barlaý kezinde úsh adamnyń máıiti tabyldy
Qaraǵandy oblysynyń Tótenshe jaǵdaılar departamentiniń baspasóz qyzmeti jarylys bolǵan páterde gaz qurylǵylary tabylmaǵanyn málimdedi. Tótenshe jaǵdaıdyń sebep-saldary naqtylanýda, dep habarlaıdy Almaty-akshamy.kz QazAqparatqa silteme jasap.
Eske sala keteıik, 10 qańtar kúni saǵat 21:29-da Qaraǵandy qalasynda Respýblıka dańǵyly, 18/2 mekenjaıynda órt shyqqany týraly habarlama kelip tústi. 16 qabatty bir kireberisti 127 páterli turǵyn úıdiń 8-shi qabatyndaǵy páterde jalpy alańy 30 sharshy metr aýmaqta órt shyqty.
1979 jyly týǵan er adam janyp jatqan páterdiń balkonynan qulap, medısınalyq mekemege jatqyzyldy.
Barlaý kezinde úsh adamnyń (eki er adam men bir áıel adam bolýy múmkin) máıiti tabyldy. TJD kúshterimen páterlerden 48 adam (onyń ishinde 9 bala) shyǵaryldy jáne 82 adam (onyń ishinde 21 bala) evakýasıalandy. Saǵat 22:55-te órt oqshaýlandy. Oqıǵa ornyna TJM 88 qyzmetkeri men 23 tehnıkasy jumyldyryldy.
«Gaz jarylysy rastalmady. Oqıǵa ornynda gaz qurylǵylary tabylmady. Eshqandaı qıraýlar nemese qurylymdyq buzylýlar joq. Jylý júıeleri buzylmaǵan. Órttiń shyǵý sebebi anyqtalýda», - dep málimdedi Qaraǵandy oblysy TJD baspasóz qyzmeti.
Evakýasıalanǵan turǵyndar týystaryna jáne qaladaǵy qonaqúılerge ornalastyrylady. Oqıǵa ornynda psıhologtar jumys isteýde.
Turǵyndardy páterge qaıtarý máselesi sheshilýde.