Bul týraly Úkimet otyrysynda Densaýlyq saqtaý mınıstri Ajar Ǵınıat málim etti, dep habarlaıdy Almaty-akshamy.kz.
Mınıstrdiń sózinshe, Qaraǵandy oblysynyń Arnaýly áleýmettik qyzmet kórsetý ortalyǵynan aýrýhanaǵa túsken 14 balanyń jeteýi saýyǵyp, aýrýhanadan shyǵaryldy.
«Qazirgi tańda olar sol ortalyqtaǵy dárigerlerdiń baqylaýynda. Alty bala reanımasıa bólimshesinde jatyr, tórt balanyń jaǵdaıy oń dınamıkamen aýyr jaǵdaıda qalyp otyr. Eki balanyń jaǵdaıy óte aýyr kúıde. Jaǵdaıdyń aýyrlyǵy nevrologıalyq jáne ıntoksıkasıalyq sındromyna, tynys alý jetkiliksizdigine baılanysty bolyp otyr», - dedi A. Ǵınıat.
Onyń aıtýynsha, osy oqıǵa boıynsha respýblıkalyq jáne oblystyq deńgeıdegi mamandardyń keńeıtilgen konsılıýmdary kún saıyn uıymdastyrylyp jatyr.
«Mınıstrlik zardap shekken balalardyń jaǵdaıyna monıtorıń júrgizýdi jáne medısınalyq kómek kórsetýdi jalǵastyryp jatyr. Densaýlyq saqtaý mınıstrliginiń Sanıtarıalyq-epıdemıologıalyq baqylaý komıteti epıdemıaǵa qarsy jáne tekserý is-sharalaryn jalǵastyryp otyr. Aldyn ala epıdemılogıalyq tekserý, zerthanalyq zertteý nátıjeleri aýrýdyń taralý sıpaty tamaqtan ýlanýdan bolmaǵanyn, sondaı-aq ınfeksıalyq aýrýlardyń joqtyǵyn kórsetti. Bul jaǵdaıdyń bolýy sebebine toqtalsaq, dáriger mamandar toksıkalyq zattan qatty ýlaný dep paıymdaıdy. Qazir sot-medısınalyq saraptama júrip jatyr. Balalardyń jaǵdaıy mınıstrliktiń erekshe baqylaýynda», - dedi mınıstr.
Esterińizge sala keteıik, 30 shildede Qaraǵandy oblysynyń balalarǵa arnaýly áleýmettik qyzmet kórsetý ortalyǵynda birneshe bala ýlanyp, onyń bireýi qaıtys boldy, altaýy jansaqtaý bóliminde jatyr.
QR Densaýlyq saqtaý mınıstri Ajar Ǵınıat habarlaǵandaı, ishek ınfeksıasyna júrgizilgen synaq teris nátıje berdi.