Ulttyq kınony qoldaý ortalyǵy men Qaraǵandy oblystyq zaǵıp jáne kózi nashar kóretinderge arnalǵan kitaphana «Qoljetimdi kıno» jobasy aıasynda yntymaqtastyq týraly memorandýmǵa qol qoıdy, dep habarlaıdy aqshamnews.kz
Memorandýmnyń maqsaty – Qaraǵandy oblysyndaǵy zaǵıp jáne kózi nashar kóretin azamattardyń qazirgi zamanǵy ekrandyq mádenıetke qol jetimdiligin keńeıtý.
Kelisim aıasynda qazaqstandyq fılmder tıflokommentarıılermen kórsetilip, kórý qabileti buzylǵan kórermenderge otandyq kınematograftyń atmosferasyna enýge múmkindik jasalady. Bul yntymaqtastyq komersıalyq emes sıpatqa ıe jáne múmkindigi shekteýli adamdardy áleýmettik beıimdeýge baǵyttalǵan.
Memorandým aıasynda tıflofılmderdiń kórsetilimi uıymdastyrylady. Tıflotúsiniktemeli fılmder aýdıosıpattamamen qatar usynylady. Sonyń ishinde ortalyqtyń qoldaýymen túsirilgen «Úmit sáýlesi», «Bokser», «Búrkit» jáne taǵy da basqa kartınalar bar. Atap aıtqanda, «Úmit sáýlesi» fılmi Parıj Olımpıadasynda top jarǵan Erǵalı Shameıdiń erik-jigerin baıandasa, «Bokser» fılmi Serik Sapıevtiń sporttaǵy jetistikterin pash etedi. Al «Búrkit» fılmi quqyq qorǵaý organdarynyń kózsiz erligin dáripteıdi. Aldaǵy ýaqytta budan basqa da otandyq fılmderimizdi júıeli usynyp, bastamany elimizdiń ózge óńirlerinde jalǵastyrýdy josparlap otyrmyz.
«Mádenıet pen óner, kıno barlyǵyna birdeı qoljetimdi bolýy qajet. Biz bul jobanyń ınklúzıvti qoǵam qurý jolyndaǵy mańyzdy qadam bolatynyna senemiz!», – dedi Ulttyq kıno ortalyǵynyń Basqarma tóraǵasy Qurmanbek Jumaǵalı.