Órt jaı túskennen bolýy múmkin degen aldyn ala boljam jasaldy.
Qaraǵandy oblysynda bir mezette birneshe jerden dala órti shyqqan, dep habarlaıdy Almaty-akshamy.kz Inbusiness.kz silteme jasap.
Qarqaraly aýdanynyń Qoıandy aýyldyq okrýginde 20 maýsymda paıda bolǵan iri dala órti 21 maýsymda joıyldy. Munda 1500 ga alańdaǵy shóp janyp ketken.
Órtti sóndirýge Qaraǵandy oblysynyń TJD, órtke qarsy erikti qurylymdardyń jáne orman sharýashylyǵynyń 57 adamy men 9 birlik tehnıkasy jumyldyryldy.
Sonymen qatar, 21 maýsym kúni saǵat 14:58-de Qarqaraly aýdanynda Qý orman-toǵaı sharýashylyǵynda órt shyqqany týraly habarlama tótenshe jaǵdaılar qyzmetine túsken.
Órtti sóndirýge tótenshe jaǵdaılar mamandary jáne «Altaı Polımetaly» JSHS-niń 270 adamy men 43 tehnıkasy jumyldyryldy. Jergilikti jerdiń turǵyndary da kúndiz túni órt sóndirý qamymen júrgen. Atalmysh aýmaqtan 250 gektar jer janyp ketken. Aýdan ákimi Erlan Qusaıynnyń málimetinshe, búgin tilsiz jaý aýyzdyqtalǵanmen, áli de byqsyp jatqan jerleri bar. Tabıǵı órtti sóndirýge osy jerge basqa oblystan tikushaq jiberilgen.
Buqar jyraý aýdanynda eki dala órti tirkelgen. Birinshi órt - Qyzyltaý aýdany shatqalynda 40 ga alańda qurǵaq shóp jáne 2 ga alańda butalar jandy. Órt TJD, eriktiler jáne orman sharýashylyǵy kúshterimen sóndirildi. Ekinshi órt 21 maýsym kúni keshke Tórtkól aýylynan 20 shaqyrym jerde tirkeldi. Qurǵaq shóptiń janýy, aldyn ala boljam boıynsha, 100 ga aýmaqta jáne 1,5 ga aýmaqta oryn alǵan. Órt 22 maýsymda saǵat 05:25-te sóndirilgen.
Sonymen qatar, 21 maýsymda TJD kúshteri Osakarov aýdanynyń Jansary aýyldyq okrýgindegi iri dala órtin sóndirýge jumyldyryldy. Jalpy janý aýmaǵy qurǵaq shópten quralǵan 1200 ga aýmaqta oryn aldy. Órtti sóndirýge Qaraǵandy oblysy jáne Pavlodar oblysynyń TJD, erikti órtke qarsy jáne orman sharýashylyǵynan 26 adamy men 8 tehnıka jumyldyryldy. Órt 22 maýsymda saǵat 00:20-da joıyldy.
Qutqarýshylar sý alatyn ózen, sý qoımalarynyń sol aýmaqqa qashyq bolýy ári jeldiń kúsheıip ketýi jaǵdaıdy ýshyqtyra tústi dep otyr. Aıtýlarynsha, búginde oblystaǵy dala órti qadaǵalaýǵa alynǵan, orman órtine ulasý qaýpi joq.