Borıs Kerimbaevty eske alýǵa arnalǵan konferensıa ótti
Jazýshylar odaǵynyń májilis zalynda aýǵan soǵysynyń ardageri Borıs Kerimbaevty eske alý qurmetine arnalǵan «Er esimi – el esinde» atty ǵylymı-praktıkalyq konferensıa ótti.
Almaty ákimdiginiń qoldaýymen «Uly Dala» qoǵamdyq birlestigi, Respýblıkalyq aýǵan soǵysy ardagerleri men múgedekteri ZTB ortalyq keńesi uıymdastyrǵan basqosý jıynda Aýǵan soǵysy tarıhyna «Qara maıor» esimimen engen Borıs Tókenuly Kerimbaevtyń ómir joly, maıdan joly jaıly qoǵam qaıratkerleri men ǵalymdar baıypty baıandama jasap, onyń keıingi urpaqqa ulaǵaty aıtyldy, batyrdyń rýhyna taǵzym etildi. KSRO QM BBB (GRÝ)-diń Kerimbaev qolbasshylyq etken jasaǵy ortalyq azıalyq saıdyń tasyndaı iriktelgen saqadaı saı sardarlar men sarbazdar bolatyn. Aýǵan jerindegi Pandjer shatqalyn jyl boıy tas qamal qyp qorǵaǵan «Qara maıordy» qarsylasy, atyshýly Aýǵan komandıri Ahmad Shah Masýdtiń ózi amalsyz moıyndap, onyń basyna mıllıon dollar tikken desedi.
Zapasqa shyqqan ofıser Kerimbaev táýelsiz elimizdiń áskerı qyzmetshilerimen óziniń orasan zor tájirıbesimen bólisip, jastardy el qorǵaýǵa tárbıelep, otan[1]shyldyqqa baýlydy. Konferensıaǵa qatysqan Aýǵan soǵysynyń ardagerleri, belgili qoǵam qaıratkerleri, ǵylym men mádenıet ókilderi Kerimbaevtyń jaýyngerlik joly – antqa adaldyq pen erlikke toly ekenine toqtaldy .Konferensıaǵa qatysýshylar Borıs Kerimbaevty esimi elimizdiń soǵysta eren erligimen tanylǵan batyrlar qatarynan oryn alýǵa ábden laıyq degen toqtamǵa keldi.
Marat QOILYBAEV, Respýblıkalyq aýǵan soǵysy ardagerleri men múgedekteri ZTB ortalyq keńesiniń tóraǵasy:
ÁSKERI ANTYNA ADAL BOLDY
Ótken ǵasyrda taǵdyry mańdaıymyzǵa jazylǵan Aýǵanstandaǵy soǵysqa biz ınternasıonaldyq boryshymyzdy óteýge bardyq. Borıs Kerimbaev – sol soǵysta qolbasshy (komandır) retinde qanshama sarbazdyń elge tiri kelýine baryn salǵan suńǵyla sardar. Bizge mańyzdysy – áskerı antyna aqyryna deıin adal bolǵan Kerimbaevtyń keremet erlik úlgisin óskeleń urpaqqa ónege etý. Onyń er jigitke tán jigerliligi men ustanymdylyǵyn keıingi urpaq – jarqyn bolashaqtyń jastary, sarbazdar men sardarlar bilýi tıis. Biz soǵysty izdegen joqpyz, soǵys bizdi tapty. Biz soǵysty tilegen joqpyz, tilemeımiz. Endigi jastar beıbit zamannyń batyrlary bolsyn!