Shamamen 58 000 teńge boldy.
Munaıdyń álemdik baǵasy Ýkraına men Reseı arasyndaǵy kelissózderdiń jańa raýndy qarsańynda aıtarlyqtaı tómendedi, dep habarlaıdy Almaty-akshamy.kz Almaty.tv silteme jasap.
Dúısenbide Nur-Sultan ýaqyty boıynsha saǵat 9:51-de Brent markaly munaı fúchersteri barreline 109,62 dollarǵa (shamamen 58 000 teńge) tústi, bul aldyńǵy sesıa jabylǵan baǵadan 2,7 paıyzǵa tómen.
Amerıkalyq West Texas Intermediate (WTI) munaıynyń fúchersteri 2,8 paıyzǵa tómendep, barreline 106,23 dollarǵa (shamamen 56 000 teńge) teń boldy.
Ýkraınadaǵy soǵys pen Qytaıdaǵy koronavırýsqa qatysty shekteýlerdiń kúsheıýine baılanysty sońǵy aptalarda munaı baǵasy qubylmaly bolǵany aıtyldy.
«Munaı baǵasy osy aptada tómendeýi múmkin, óıtkeni ınvestorlar Reseıge qarsy sanksıalar áserin sezip jatyr, al taraptar atysty toqtatý týraly kelisim belgilerin kórsetti. Osy aptada AQSH-tyń Ashyq naryq federal komıteti otyrysynda aqsha-nesıe saıasatyna nazar aýdarylady. Bul dollardy odan ári nyǵaıtyp, taýar baǵasyna qysym jasaýy múmkin», - dep túsindirdi CMC Markets taldaýshysy Tına Ten.
AQSH Ashyq naryq federal komıteti (FOMC) 15-16 naýryzda paıyzdyq mólsherlemelerdi kóterý týraly sheshim qabyldaýǵa jınalady. Federal rezervtik júıe osy aptada mólsherlemelerdi kótere bastaıdy dep kútiledi, bul munaı baǵasyna qysym túsiredi, shetel valútasyn ustaýshylarǵa taýarlar qymbattaıdy.
«Reseı men Ýkraına arasyndaǵy jaǵdaı óte qubylmaly jáne naryq osy baǵyttaǵy oqıǵalarǵa óte sezimtal. Sonymen qatar Qytaıda COVID-19 jaǵdaılarynyń kóbeıýi suranysqa qatysty alańdaýshylyq týdyrady», - dedi ING taýardy zertteý bóliminiń basshysy Ýorren Patterson.
Álemdegi eń iri shıki munaıdy ımporttaýshy jáne AQSH-tan keıingi ekinshi tutynýshy Qytaıda COVID-19 juqtyrý jaǵdaılarynyń ósýi baıqalady.