Baǵaǵa geosaıası jaǵdaı áser etip otyr.
Juma kúni tańerteńgi saýdada Brent markaly munaı baǵasy barreline 108,82 dollarǵa deıin kóterildi, dep habarlaıdy Almaty-akshamy.kz QazAqparatqa silteme jasap.
Beısenbi kúngi saýdada bul markaly munaı barreliniń quny 108,71 dollarǵa jetkenimen, kún sońynda 107,45 dollar boldy. 13 mamyr kúni tańerteńgi jaǵdaı boıynsha elıtalyq munaı markasynyń baǵasy 1,28 paıyzǵa ósip, barreline 108,82 dollardy qurady.
WTI markaly munaı fúchersteriniń quny barreline 107,25 dollar boldy.
«Qara altynnyń qymbattaýy Reseı men Ýkraına arasyndaǵy soǵys saldarynan energıa tasymaldaýshylar jetkiziliminiń tómendeý qaýpimen baılanysty», - delingen habarlamada.
Eýroodaqqa múshe elderdiń ókilderi Reseıden munaı ımportyna tyıym salý úshin birneshe eldiń basshylarymen kezdesýler ótkizýde. Ekinshi jaǵynan, reseılik munaı óndirisiniń quldyraýy álemdik naryqta jetkizilim tapshylyǵyna qatysty alańdaýshylyqty kúsheıtti.
Halyqaralyq energetıka agenttiginiń málimetinshe, sáýir aıynda reseılik munaı óndirisi táýligine shamamen 1 mıllıon barelge azaıdy. Buǵan Batys sanksıalary aıasynda munaı ónimderi eksportynyń tómendeýi, ishki suranystyń azaıýyna baılanysty munaı óńdeý zaýyttarynyń munaıdy áldeqaıda az óńdeýi sebep bolyp otyr.