2024 jyldyń 17 jeltoqsanynan 2025 jyldyń 12 qańtaryna deıin Almaty sırkinde jańa jyldyq ertegi — «Qar patshaıymy» qoıylymy ótedi, dep habarlaıdy aqshamnews.kz
Bul merekelik qoıylymda ǵajaıyptar men meıirimdilikke toly sıqyrly oqıǵa kórermenderdi baýrap alady. Qoıylymnyń basty keıipkerleri Djonık pen Kamılla sıqyrly oqıǵalar álemine tap bolady. Qazaq memlekettik sırkiniń rejıserlik-qoıylym toby bul jańa nusqadaǵy kóne ertegini zamanaýı sırk tilinde usynady.
Qoıylymda belgili Kaıa men Gerda keıipkerleriniń ornyna Djonık pen Kamılla shytyrman oqıǵalardan ótedi. Sıqyrshylar, sondaı-aq Kúlki qorǵaýshysy, Kóktem, Jaz, Kúz basty keıipkerlerge Qar patshaıymynyń muzdy júregin eritýge kómektesedi. Olar Jańa jyldyń qojaıyny bolatyn Qar patshaıymyna mindetti túrde balalyq qýanysh pen merekeni eske salýy tıis.
Qazaq memlekettik sırkiniń bas qoıýshy rejıseri Marına Redko atap ótkendeı, «Djonık pen Kamılla bizdiń kórermenderge unaǵany sonshalyqty – olar jańa jyldyq qoıylymnyń basty keıipkerleri bolyp otyr. Bul keıipkerler bizge balalyq shaǵymyzda ertegiler álemine saıahat jasaǵan sátterdi eske túsiredi». Sonymen qatar, qoıylym úshin arnaıy jańa sırk nómirleri, eksklúzıvti kostúmder men rekvızıtter daıyndalyp, úlken lazerlik shoý uıymdastyrylady.
Merekelik baǵdarlamada Iý.Nıkýlın atyndaǵy Máskeý sırkiniń ártisteri ózderiniń úıretilgen janýarlarymen, kún shýaqty Ispanıadan kelgen kúlkili kloýn jáne Almaty sırkiniń úzdik ártisteri qatysady. Buǵan qosa, halyqaralyq sırk óner festıvaliniń jeńimpazdary men laýreattary — áýe gımnasttary, ekvılıbrıser, akrobattar jáne «Nomad» kaskaderleri óz ónerlerin kórsetedi.
Qoıylymnyń tusaýkeseri 17 jeltoqsan kúni, saǵat 12:00-de Qazaqstan Respýblıkasynyń Táýelsizdik kúnine oraı ótedi. Bul qoıylym qalalyq Máslıhat depýtattarymen birlesip, halyqtyń az qamtylǵan jáne kóp balaly otbasylardyń balalaryna, ardagerlerge jáne qarttarǵa arnalady. Qoıylymnyń uzaqtyǵy 2 saǵatty quraıdy, al antrakt 15 mınýtqa sozylady.