Áleýmettik jelide birneshe vıdeolardan erekshe obrazdaǵy almatylyq jigittiń beınesin kórgen bolarsyz. Syrt kelbetine qarap ózge ult ókili dep baǵa bergen jandar, onyń dombyranyń qulaǵynda oınap, Abaıdyń qara sózin jatqa bilgenine tańǵalǵandaryn jasyrmady. Erekshe keıiptegi "erkindiktiń" sımvolyna aınalǵan jasóspirim kim? Aqshamnews.kz tilshisi jurt nazaryndaǵy jetkinshekti taýyp, tildesti.
"Qanym orys bolsa da, janym - qazaq"
Vadım Travın - Almaty oblysy, Nurǵısa Tilendıev atyndaǵy qarapaıym aýyldyń týmasy. Ulty - orys. Dese de, bolmysym, janym, álemim qazaq deıdi ol. Qazir aýylyndaǵy orta mektepte 11-synyp oqyp jatyr.
"Meni jaı ǵana "Vadá" dep ataǵan unaıdy. Solaı jaǵymdyraq. Kileń beske oqımyn. Pándik olımpıadalarǵa jıi qatysamyn: tilder, robototehnıka, qysqasy erekshe salalardyń kóbi qyzyqtyrady. Qanym orys bolsa da, janym - qazaq. Óz elimniń mádenıeti men tarıhyn erekshe qurmetteımin",- deıdi ol.
"Syrt kelbet emes, ishki álem mańyzdy"
Vadımdi kórgen jan birden onyń erekshe stıline kóz tastaıdy. Rasynda, bir qaraǵanda álemi basqa, ulttyq qundylyqtan ada jan sekildi kóringenimen, Vadımniń ustanymy, ómirge degen kózqarasy erekshe. Ol kitap oqyǵandy, jańa dúnıelerdi zerttegendi, shyǵarmashylyqty jany súıedi.
"Qazirgi stılim burynǵy bir serıaldaǵy keıipkerdiń kospleıinen bastaldy. Biraq ýaqyt óte kele ol tolyqtaı meniń beıneme aınaldy. Bul bir jaǵynan marketıń, bir jaǵynan ishki bostandyqtyń kórinisi. Adamdar keıde syrt kelbetime qarap qate oılaıdy: bireý “satanıst”, bireý “narkoman” deıdi. Al jaqynyraq tanysqanda naǵyz shyǵarmashylyqqa berilgen, mýzykany súıetin, patrıot ekenimdi kóredi. Bul da kishkentaı áleýmettik eksperıment: "syrtynan qarap ton pishpe" degendi jetkizgim keledi", - deıdi jas óren.
Hakim Abaı men Vadımdi ne baılanystyrady?
Joǵaryda aıtqanymyzdaı, Vadım kitap dese ishken asyn jerge qoıatyn jan. Ásirese Júl Vernniń shyǵarmalaryn jaqsy kóretinin aıtty. Kóbine kórkem ádebıetpen áýestenetin Vadá kitaptyń emosıanal ıntellektin qalyptastyrýǵa áseri mol bolǵanyn, ásirese Abaı Qunanbaıulynyń shyǵarmashylyǵyn erekshe kóretinin jasyrmady.
"Abaıdy" basynda asa túsinbegendikten qabyldaı almadym. Pándik olımpıada úshin jattatqyzǵan kezde tipti jek kórgenmin. Biraq keıin ol maǵan "ózi" jaqyndady. Abaıdyń qara sózderimen tanysyp, abaıtanýshylarmen sóıleskennen keıin onyń oılary búgingi kúnge de dál keletinin uqtym. Maǵan eń jaqyny - Jetinshi sóz. Onda adam balasynyń balalyq tazalyqty joǵaltqanda ǵana rýhanı quldyraıtyny aıtylady. Al men ómir boıy "sol balany" joǵaltpaýǵa tyrysamyn", - dep qosty ol.
Esterińizde bolsa, Vadımniń áleýmettik jelide kóshede ketip bara jatqan saýalnama alýshylardyń birine Abaıdyń qara sózin oqyp bergen vıdeosy kóp qaralym jınaǵan edi. Jurt onyń syrt kelbetine qarap, qara sózdi jatqa aıtyp beredi dep oılamaǵandaryn aıtty.
Elektrli dombyrany oılap tapqan tuńǵysh oqýshy
Vadım Travın elektrli dombyra oılap tapqanymen de erekshelenedi. Ol óziniń paraqshasynda tájirıbe jasap, dombyrany zamanýı yrǵaqqa salyp kórgenin bólisken edi. Keıin ol beıneleri birneshe mıllıon qaralym jınap, kóptiń nazaryn aýdardy. Al Vadımniń ózi ulttyq aspapqa degen mahabbaty qalaı paıda bolǵanyn áńgimelep berdi.
"Dombyramen alǵash 4-synypta tanystym. Biraq úıirmege qatysýǵa qarjym bolmady. "Dombyrada oınaý" degen armanym sol kúıi qalyp qoıǵan. Keıin 8-synypta eńbek sabaǵynda ustazym eski dombyrany jóndep jatqanyn kórdim. Armanymdy aıttym. Kelesi sabaqta ol sol dombyrany maǵan syılady. Sodan bastap ózim úırenip aldym. Keıin dombyraǵa rok stılinde ún qosýdy jón kórip, tájirıbe jasap kórdim. Munym kóbine unaǵandaı boldy", - deıdi Vadá.
Qazir Vadım dombyra ǵana emes, gıtara, fleıta sekildi jalpy 9 túrli mýzykalyq aspapta oınaıdy.
Shyǵarmashylyq jol jáne Abaı týraly túsinik
Vadım óziniń ishki áleminen syr shertip, shyǵarmashylyq kózqarasy jaıly oı bólisti. Óziniń erekshe tulǵasyn qalyptastyrý jolynda júrgen ol, keleshegin shyǵarmashylyq álemnen kóretinin aıtty.
"Jas bolsam da men kóp jerde jumys istep kórdim. Biraq bir nárseni anyq túsindim. Tańerteń jumysqa barý, keshke úıge qaıtý, jylyna bir ret demalys alý sıaqty shekara ishindegi ómir - meniki emes. Qazir ózime unaıtyn ispen aınalysyp, shaǵyn bolsyn aýdıtorıamdy qalyptastyrǵanmyn. Shyǵarmashylyq - meniń ómirimniń máni. Bolashaqta da sonymen ómir súrgim keledi. Ol meni talaı belesterge jeteleıtinine senemin", - dedi ol.
sýretter: keıipkerdiń jeke muraǵatynan alyndy
Sondaı-aq, ol bilim jolynda óz túsinigin qalyptastyrǵan jan retinde qazirgi jastarǵa Abaı Qunanbaıulynyń fılosofıasyn erkin túrde túsinýge shaqyrdy.
"Abaıdyń aıtpaǵyn kez kelgen adam kúshpen tyqpalamasa ǵana túsinedi. Jastarymyzdyń emosıonal ıntellektisi joǵary, tolerantty. Olarǵa Abaıdyń fılosofıasy jaqyn. Biraq bárine adamnyń ózi sanaly túrde túsinip baryp kelýi kerek", - dep qosty ol.