Memlekettik qýyrshaq teatry Berdibek Soqpaqbaevtyń álemge tanylǵan «Meniń atym – Qoja» shyǵarmasyn tuńǵysh ret qýyrshaq beınesinde sahnalap, kórermen nazaryna premerasyn usynady.
Qazaq balalar ádebıetiniń altyn qorynan oıyp oryn alǵan klasıkalyq týyndy – ult rýhanıatynyń máńgilik qundylyqtaryn dáripteıtin shyǵarmalardyń biri. Halyqtyń súıikti keıipkerine aınalǵan Qoja beınesi sahna tórinde qýyrshaq óneriniń tilimen jańasha sıpat alyp, kishkentaı kórermenniń júregine jol tartpaq.
Qoıylymnyń rejıseri – Erkebulan Qabdyl. Ol óz eńbeginde shyǵarmanyń basty ıdeıasy balalyqtyń shynaıy álemin, ójettigi men ańǵal tazalyǵyn saqtaı otyryp, qazirgi zaman balasyna túsinikti ári tartymdy túrde jetkizýdi maqsat etken.
Insenırovka avtory Damır Amantaı kórermenge ádebıet pen teatrdyń túıisken tusynda jańa kórkemdik sheshim usynady. Onyń dramatýrgıalyq nusqasy Qojanyń ishki jan dúnıesin, arman-qıalyn jáne ómirge degen kózqarasyn qýyrshaq teatrynyń poetıkasyna úılestirip, shyǵarmanyń rýhyn tereń ashady.
Qoıylymnyń beınelik álemin qalyptastyrǵan sýretshi Iýlıa Chernova balalarǵa tanys aýyl tirshiligin, mektep ómirin jáne Qojanyń erkin minezin beıneleıtin sahnalyq keńistik pen qýyrshaq keıipkerlerdi kórkem sheshimmen usyndy.
Mýzykalyq árleýdi kompozıtor Nursultan Tóreálı oryndaǵan. Onyń áýenderi oqıǵa jelisin sezimmen órip, Qojanyń kóńil kúıin áýez arqyly jetkizedi. Al qoıylymnyń bı qımyldaryn baletmeıster Rınat Bılıbaev sahna yrǵaǵyna úılestirip, kórinisterge serpin men oıyndyq sıpat berdi.
Mereıli 90-shy maýsymdaǵy óner ordasynyń kezekti premerasy – ádebı murany zamanaýı sahna óneri arqyly nasıhattaýdyń biregeı úlgisi. Kórermen Qojanyń kúlki men qaıshylyqqa toly balalyq álemine enip, onyń oı-sanasynyń qalyptasý jolyna kýá bolady.
Qoıylym tek balalarǵa ǵana emes, ata-analar úshin de áserli bolmaq, óıtkeni árbir eresek kórermen óz balalyq shaǵyn, alǵash jasaǵan qatelikter men arman-qıaldaryn Qojanyń beınesinen qaıta tabady.
Almat Amangeldi, Memlekettik qýyrshaq teatrynyń dırektory: «Biz úshin Berdibek Soqpaqbaevtyń shyǵarmasyn qýyrshaq teatry sahnasyna shyǵarý – úlken jaýapkershilik. Bul týyndy ár býynnyń júregine jol tapqan. Endi sol rýhanı murany qýyrshaq óneri arqyly jańǵyrtyp, jas kórermenge jetkizý – bizdiń basty maqsatymyz».
Premera kúni men ýaqyty: 13 qarasha 2025 jyl, saǵat 14:00
Ótetin orny: Memlekettik qýyrshaq teatry (Pýshkın k-si, 63)
Gúlim KÓPBAIQYZY