Qańtar qurbandaryna arnalǵan «Taǵzym» memorıaldyq kesheni «Turan» ýnıversıtetine jaqyn mańnan oryn tepken. Sondyqtan onda oqıtyn jastar men dáris beretin oqytýshylar bul sáýlet kesheniniń mán-maǵynasyn jaqsy túsinetini sózsiz.
Atalǵan ýnıverdiń oqytýshysy, fılologıa ǵylymynyń kandıdaty, qaýymdastyrylǵan profesor Gúljan Tólekova el ishinde dúrbeleń týǵan kúni jumys ornynda túske deıin ǵana otyryp, tústen keıin úıine qaıtqan bolatyn. Ol kezde stýdentter qysqy demalysqa tarap ketken. Túsiniksiz jaǵdaılar keshke bastaldy deıdi ol.
– Qas qaraıǵan shaqta úıge áýeli balalarym, odan joldasym keldi jumystan. «Kóshedegi ahýal birtúrli, kólikter bir-birine baǵynbaı, kepteliske de qaramaı, bir-birin basyp ozyp jatyr. Kósheden órtenip jatqan mashınalardy da kórdik» dedi olar mazasyz kóńilmen. Erteńine kúıeýim ekeýmiz nan alýǵa shyqtyq. Biraz jer júrdik. Eshbir dúkennen nan tappadyq. Jolaı kezikken, túr-álpeti bóten kórinetin adamdardyń júzi tym sýyq kórindi. Bári sýyt júrgendeı. Kózderi alaq-julaq etedi. Kópqabatty úılerdiń birinshi qabatynda ornalasqan bank, dúken, dárihanalardyń tonalǵanyn kórdik. Aınala nan izdegen aǵaıyn. Sol kezde nandy dúkenniń ishinen pisirip satyp jatty. Qolymyzda bank kartasy, biraq tamaq satyp alatyn aqshamyz joq. Bul bir qıyn sátter boldy. Sol mezetterde oryn alǵan el ishindegi dúrbeleńde bizdiń qalaǵa múlde bóten adamdar kirip ketkendeı áserde boldym, ony men sózben aıtyp jetkize almaımyn, – deıdi Gúljan Qajymuratqyzy ótken kúnderdi eske alyp.
Erteńine de syrtqa shyǵýyna týra keldi. Sebebi, úsh-tórt kún buryn soǵymǵa tapsyrys berip qoıǵan bolatyn. Terezeden úńilip qarap edi, syrtta áldekimderdi toryp júrgen mashınalardy kózi shaldy. Sonda da aýlaǵa shyqty. Aýlada úsh-tórt bala alańsyz oınap júripti. Bir kezde tutqıyldan atys bastalyp ketkende, sileıip turdy da qaldy. Oıyn balalarynyń aldynan bir jigit qasha jónelip, ony polısıa ókilderi qýyp ketken. Beıbit ómirde osyndaı atysty kórem dep kim oılasyn, Gúljan Qajymuratqyzy aýrýhanaǵa túsip qalady.
Keı-keıde «Taǵzym» memorıaldyq kesheniniń janynan óte qalǵanda, sol kúnder sanasynda jańǵyryp turyp alatyny bar. Sol bir sátter kóz aldynan kınonyń lentasyndaı óte bastaıdy. Keıin osynaý syn saǵatta áskerı boryshyn ótep júrgen jas sarbazdardyń da Almaty tynyshtyǵyn, beıbit turǵyndardyń ómirin qorǵaýǵa atsalysqanyn estip, ana retinde tipti tolqydy.
Qazir stýdentterine qazaq halqynyń san ǵasyrlyq armany bolǵan qasıetti táýelsizdigimizge qater tóndirgen qańtar oqıǵasy týraly jıi aıtyp, olardy beıbit ómirdiń qadirin bilýge shaqyryp otyratyny bar. Al «Taǵzym» memorıalynyń ashylýyn bizdiń el basyna kún týǵan aýyr kúnderde qaza tapqan otanshyl azamattarymyzǵa degen úlken qurmet dep biledi.