Qańtar oqıǵasynda qansha adam zardap shekti?
Qańtar oqıǵalarynda oq tıgen 2 bala ólip, 7-eýi jaraqat aldy. Bul týraly QR DSM Medısınalyq jáne farmasevtıkalyq baqylaý komıtetiniń tóraǵasy Baýyrjan Baıserkın aıtty, dep habarlaıdy Almaty-akshamy.kz QazAqparat saıtyna silteme jasap.
«Tótenshe jaǵdaı kezeńinde medısınalyq uıymdarǵa 2 740 zardap shekken adam kómek alýǵa júgindi. Olardyń ishinde 1 843 adam ambýlatorlyq kómek alyp, 897 adam aýrýhanaǵa jatqyzyldy. Onyń ishinde 188 adam reanımasıalyq bólimshede boldy. Búginde 891 pasıent jazylyp shyqty», - dedi Baýyrjan Baıserkın Ortalyq komýnıkasıalar qyzmetindegi baspasóz máslıhaty barysynda.
Onyń atap ótýinshe, 177 adam medısınalyq uıymdarda ómirden ozdy.
«Qazirgi ýaqytta 6 adam, Almaty men Qyzylordada 3 adamnan stasıonarlarda em alyp jatyr. Olardyń biriniń jaǵdaıy aýyr, oq tıgen. Em alýda. Elimizdiń úsh óńirinde kámeletke tolmaǵan balalar zardap shekti. Almatyda 2 bala oq tıip qaza tapty. 7 bala túrli oq jaraqatymen aýrýhana tústi. Olardyń 4-eýi – Almatyda, ekeýi – Almaty oblysynda jáne bireýi – Jambyl oblysynda. Sonymen qatar Almaty oblysynda bir júkti áıel shashylǵan gazdan zardap shekti», - dedi Baýyrjan Baıserkın.