«Orynbor aımaqtyq qazaq-ulttyq mádenı avtonomıasy» qoǵamdyq uıymynyń birneshe ókili Qazaqstanǵa keldi.
Olar apta sońyna deıin elordada «Otandastar qory» arnaıy uıymdastyrǵan qazaqtyń ulttyq mádenıeti, ádet-ǵurpy jáne qazaq tili taqyryptaryn qamtıtyn sheberlik sabaqtaryna qatysady, dep habarlaıdy Almaty-akshamy.kz.
Qandasymyz Áıgerim Bıjanovanyń aıtýynsha, Qazaqstanǵa kelýdegi basty maqsat – ulttyq qundylyqtardy jaqynyraq tanysa otyryp, Reseı qazaqtary arasynda dáripteý.
Orynborda 120 myńnan astam qazaq turady. «Aımaqtyq qazaq-ulttyq mádenı avtonomıasy» qoǵamdyq uıymy 2008 jyly qurylǵan.
«Orynbor qalasynda mádenı avtonomıa, ıaǵnı mádenıet salasyndaǵy ortalyǵymyz bar. Biz qazir lısenzıa alý ústindemiz. Bilim salasy boıynsha ortalyq ashylyp jatyr, taǵy 5 sala bar. Birinshi sala, árıne, til. Qazaq tili, dombyra klasy, bı jáne Qazaqstan tarıhy, salt-dástúri jaǵynan jáne qolóner. Osyndaı 5 salany qamtıtyn ortalyq ashylyp jatqandyqtan, osynda kelýdegi maqsatymyz – tolyq aqparat alý. Ózimizdiń qazaqtar qalaı turdy, saqtalǵan qandaı salt-dástúrleri bar. Bizdiń sol bilgenimizdi Orynbor qazaqtaryna, jasóspirimderge, ósip kele jatqan urpaǵymyzǵa qaldyrý – maqsatymyz», - deıdi «Orynbor aımaqtyq qazaq ulttyq mádenı avtonomıasy» qoǵamdyq uıymynyń ókili Áıgerim Bıjanova.