Azaptaý deregi boıynsha 203 qylmystyq is qozǵaldy.
Bas prokýratýranyń otyrysynda qańtar oqıǵasyndaǵy azamattardyń konstıtýsıalyq quqyǵyn saqtaý máseleleri talqylandy, dep habarlaıdy Almaty-akshamy.kz
Prokýratýranyń baspasóz qyzmetiniń málimetinshe, otyrysqa Bas prokýrordyń mindetin atqarýshy Berik Asylov, Adam quqyqtary jónindegi ýákil Elvıra Ázimova, Respýblıkalyq advokattar alqasy tóraǵasynyń orynbasary Igor Vranchev, quqyq qorǵaý jáne arnaıy organdardyń basshylary qatysty.
Berik Asylov Memleket basshysynyń tapsyrmasy boıynsha qaıǵyly oqıǵanyń sebepteri muqıat tergep-tekserilip jatqanyn atap ótti.
«Qazir biz beıbit mıtıńterdi ártúrli kúshterdiń paıdalanǵanyn naqty bilemiz. Uıymdastyrýshylar destrýktıvti jáne qylmystyq toptardy tartyp, qarýlandyryp, olardyń áreketterin úılestirgen. Tártipsizdikter azamattarǵa qarsy zorlyq-zombylyqpen, qıratýmen jáne tonaýmen qatar júrgen. Olardyń maqsaty halyqty qorqytyp, bıliktiń jumysyna tosqaýyl qoıý boldy», - dedi Bas prokýrordyń mindetin atqarýshy.
Bas prokýratýra Qylmystyq qýdalaý qyzmetiniń basshysy Serik Shalabaev qańtar oqıǵasy kezinde jáne keıin ustalǵandardyń quqyǵyn qorǵaý erekshe baqylaýda ekenin jetkizdi.
«Búginde azaptaý jáne qyzmettik ókilettikti asyra paıdalaný boıynsha 203 qylmystyq is qozǵaldy. Olardyń ishindegi eń rezonans týdyrǵandaryn arnaıy prokýrorlar tekserip jatyr. Sotqa deıingi tergep-tekserý barysynda ustalǵandarǵa qatysty zańsyz tergeý ádisterin qoldandy degen kúdikpen 9 qyzmetker ustaldy», - dedi basshy.
Onyń aıtýynsha, qańtar oqıǵasy saldarynan tergeý-jedel toptary terorızm aktileri, kisi óltirý, qarý urlaý jáne jappaı tártipsizdikter boıynsha 3502 qylmystyq isti tergeýde. Bul ister boıynsha 737 kúdikti tergeý ızolátorynda qamaýda otyr. Serik Shalabaev bultartpaý sharasyn ózgertýmen 307 adam, onyń ishinde kámeletke tolmaǵan 27 jasóspirim qamaýdan bosatylǵanyn, 2 jasóspirim qamaýda otyrǵanyn aıtty. Búginde bultartpaý sharasyn ózgertý týraly arnaıy prokýrorlardan taǵy 22 adamǵa qatysty materıaldar túsken.