Olar apaly-sińlili jáne bireýiniń kúıeýi, úsheýi de Almaty oblysynyń turǵyndary.
Ustalǵandardyń úıinen 130 túrli parfúmerlik jáne kosmetıkalyq ónim tabyldy, dep habarlaıdy Almaty-akshamy.kz
Kóliktegi polısıa qańtardaǵy tártipsizdik kezinde Almaty áýejaıynda dúken tonaǵan úsh adamdy ustady. Olar qoldy etken taýardyń 200-den astam túri tárkilendi.
İİM kóliktegi polısıa departamentiniń jedel tergeý toby Almaty áýejaıyndaǵy dúkenderden taýar urlaý faktisi boıynsha sotqa deıingi tergeý júrgizip jatyr.
Kóliktegi polısıa departamentiniń bastyǵy Onal Bákıevtiń aıtýynsha, beınebaqylaý jazbalaryn qaraý kezinde úsh kúdikti anyqtaldy: apaly-sińlili jáne bireýiniń kúıeýi. Úsheýi de Almaty oblysynyń turǵyndary.
«Olar 6 qańtarǵa qaraǵan túni jappaı tártipsizdik kezinde áýejaıda bireýdiń múlkin urlaǵan. Kúdiktilerdiń turǵylyqty jeri boıynsha tekserý kezinde zattaı aıǵaq – elıtalyq alkogól, sondaı-aq 130 túrli parfúmerlik jáne kosmetıkalyq ónim alyndy. Sonymen qatar kofehanadan, kádesyı dúkeninen jáne dárihanadan urlanǵan 94 túrli taýar tárkilendi», - dedi kóliktegi polısıa departamenti bastyǵy Onal Bákıev.
Atalǵan fakti boıynsha Qylmystyq kodekstiń 188-babyna sáıkes («Urlyq») sotqa deıingi tergeý bastaldy. 40 jastaǵy er adamǵa qatysty qamaýǵa alý túrindegi bultartpaý sharasyna sanksıa berildi, 34 jastaǵy jáne 26 jastaǵy eki áıel jas balalarynyń bolýyna baılanysty eshqaıda ketpeý týraly qolhat ótkizdi.