Qańtar-aqpanda el ekonomıkasy 4,3 paıyzǵa ósti. Bul týraly Ulttyq bank tóraǵasy Ǵalymjan Pirmatov aıtty, dep habarlaıdy Almaty-akshamy.kz QazAqparat-qa silteme jasap.
«Qazaqstan ekonomıkasy 2023 jylǵy qańtar-aqpan aılarynda 4,3 paıyzǵa ósti. Bul Ulttyq banktiń osy jylǵa belgilegen 3,5-4,5 paıyz deńgeıindegi boljamdaryna sáıkes keledi. Naqty sektor 2,7 paıyzǵa, al qyzmet kórsetý salasyndaǵy iskerlik belsendilik 5 paıyzǵa ósti. Bıylǵy aqpan aıynda tutyný taýarlaryn óndirý kólemi edáýir artty. Qurylys jumystarynyń qurylymynda kóp páterli turǵyn úılerdi paıdalanýǵa berýdiń artqany baıqalady. İshki suranys – turaqty. Bul bólshek taýar aınalymynyń oń dınamıkasynan kórinip otyr», - dedi Ǵalymjan Pirmatov.
Onyń dereginshe, qańtar-aqpan aılarynyń qorytyndysy boıynsha, bólshek taýar aınalymy naqty mánde 12,9 paıyzǵa ósti.
«Ótken jyldyń tómen bazasyna qaramastan, avtomobıl, elektrlik turmys tehnıkasy, azyq-túlik ónimderi men kıim-keshek satý da bólshek taýar aınalymynyń ulǵaıýyna áser etti», - dedi ol.