Shıkizatty qabyldaý quny 40 myń teńgege jetti.
Aýyl sharýashylyǵy vıse-mınıstri Ábilqaıyr Tamabek qant salasyna memlekettik qoldaýdy kúsheıtý týraly aıtty, dep habarlaıdy Almaty-akshamy.kz QR ASHM baspasóz qyzmetine silteme jasap.
Atap aıtqanda, sharýashylyqtardyń qant qyzylshasyn ósirýge jumsaǵan shyǵyndary jyl saıyn ósip otyratyny jáne bıylǵy jyly 1 gektarǵa jumsalǵan shyǵyndar 900 myńnan 1 mln teńgege deıin jetkeni atap ótildi.
Qyzylsha ósirýshilerdiń memlekettik qoldaý tásilderin qaıta qaraý jónindegi ótinishterin eskere otyryp, Aýyl sharýashylyǵy mınıstrligi sýbsıdıalar normalaryn ulǵaıtty. Osylaısha shıkizatty qabyldaý qunyn burynǵy 30 myń teńgeniń ornyna 40 myń teńgege jetkizdi. Sonyń arqasynda qant qyzylshasynyń rentabeldiligi júgeri, raps jáne soıa sıaqty daqyldardyń deńgeıine deıin teńestiriledi.
Sondaı-aq Aýyl sharýashylyǵy vıse-mınıstri memleket qyzylsha ósirýshilerge qoldaý kórsetýdi jalǵastyratynyn, qant salasyn damytý jónindegi jospar ázirlengenin atap ótti.
Qaıta óńdeýge tapsyrylǵan qant qyzylshasyn sýbsıdıalaýdy ulǵaıtýǵa kelesi jyly shamamen 11,5 mlrd teńge búdjet qarajatyn bólý josparlanyp otyr. Sondaı-aq, búginde tuqym, gerbısıdter, tyńaıtqyshtar qunynyń 50%, tehnıka qunynyń 25% sýbsıdıalanady, bul rette sýbsıdıalaýdyń jańa qaǵıdalarynda tehnıkanyń ruqsat etilgen eń joǵary qunynyń belgilengen lımıtterin ózektendirý josparlanyp otyr.
«Budan bólek, memlekettik qoldaý sharalaryn jetildirý boıynsha jumys sheńberinde qyzylsha jınaıtyn kombaındardy satyp alýǵa óteý normatıvin 50% deıin ulǵaıtý máselesi pysyqtalyp jatyr. Memlekettik qoldaýdyń jańa erejeleri 2023 jyldan bastap kúshine enedi dep kútilip otyr», - dedi Ábilqaıyr Tamabek.
Kezdesýde sharýalar qant salasyn damytý perspektıvalary týraly óz pikirlerimen bólisip, túsimniń, ıaǵnı paıdanyń ósýine tikeleı yqpal etetin agrotehnologıalardy saqtaýdyń mańyzdylyǵyn atap ótti.
Qant salasyn damytýdyń 2026 jylǵa deıingi keshendi josparyn iske asyrý aıasynda egis alqaptaryn 38 myń gektarǵa deıin ulǵaıtý josparlanyp otyr.