Parlament Májilisinde ótken Úkimet saǵatynda depýtattarǵa Áleýmettik kodekstiń jobasy tanystyryldy.
Eńbek jáne halyqty áleýmettik qorǵaý mınıstri Tamara Dúısenova qandastardy elde qabyldaýda qandaı ózgerister bolýy múmkin ekenin aıtty, dep habarlaıdy Almaty-akshamy.kz QazAqparatqa silteme jasap.
«Besinshi novela – bul jańa kóshi-qon saıasaty. Onyń maqsaty – Qazaqstan ekonomıkasyn suranysqa ıe jáne bilikti kadrlarmen qamtamasyz etý. Jańa kóshi-qon saıasaty 4 mindetti sheshýdi kózdeıdi: suranysqa ıe kadrlardy tartý; ınvestısıa tartý; shetelde turatyn etnıkalyq qazaqstardyń áleýetin paıdalaný; shetelde jumys isteıtin qazaqstandyqtardyń eńbek quqyqtaryn qorǵaý», - dedi Tamara Dúısenova.
Birinshi mindet aıasynda ekonomıka salalary úshin suranysqa ıe tehnologıalar boıynsha úzdik oqytýshylardy, úzdik ǵalymdardy, tapshy kásipter boıynsha mamandardy tartý maqsatynda jeńildetilgen vızalar men 10 jylǵa turý quqyǵy beriledi.
Mınıstrdiń aıtýynsha, ekinshi mindetti sheshý úshin 300 myń AQSH dollarden kem emes ınvestısıa salýdy kózdegen shetel kásipkerleri úshin «Investorlyq vızany» usynady.
«Úshinshi mindette kórsetilgen tapsyrmalardy sheshý úshin «Atameken» kartasy engiziledi, ol joǵary deńgeıdegi kásipqoı nemese ózderi turatyn elderde tabysty bıznes-keısterdi iske asyrǵan jáne olardy Qazaqstanda iske asyrýdy qalaıtyn etnıkalyq qazaqtarǵa beriledi. Ol azamattar merzimi 10 jylǵa deıin sozylatyn jeńildetilgen vıza rásimdep, Qazaqstanda turyp óz kásibin júrgizýge múmkindik alady», - dep túsindirdi ol.
Qandastardy qabyldaý tetigi de qaıta qaralatynyn mınıstr atap ótti. Qandastardy qonystandyrý saıasatyn eldiń demografıalyq jáne ekonomıkalyq úrdisterin eskere otyryp, olardy qujattardy qabyldaýdyń bastapqy kezeńinde qonystandyrý óńirlerine kóship-qonýdy qosymsha yntalandyra otyryp túbegeıli reformalaý usynyldy.
Shetelde jumys isteıtin qazaqstandyqtardyń eńbek quqyqtaryn qorǵaý úshin azamattarymyz eń kóp jumys isteıtin elderde qazaqstandyq eńbek mıgranttarynyń quqyqtaryna kepildik beretin memleketaralyq kelisimder paketin qabyldaý qarastyryldy.