Beıjiń Olımpıadasy qandas baýyrlarymyzdyń kóptep qatysýymen de erekshelendi.
Qytaı quramasy sapynda kónkıshi Aqnar Adaq, shańǵyshylar Bánıa Jálen jáne Qadys Bedelhan óner kórsetti. Aqnar jeke jarystarda da, komandalyq synda da óte jaqsy óner kórsetip, jurt yqylasyna ıe boldy. 1000 metr qashyqtyqtaǵy jarystan keıin ol ózine qoldaý bildirgen qazaqstandyqtarǵa arnaıy beınesholýmen jaýap qatyp, ystyq yqylasyn jetkizdi.
Al Phenchhan Olımpıadasynyń chempıony, bıatlonshy Dınara Álimbekova (Belarýs) osy joly júldege iline almady. Álem kýbogynda jeke synda ekinshi orynda kele jatqan qandasymyz Beıjińde jeke jarysta júldege meılinshe jaqyn kelgen edi. Biraq sońǵy atý kezeginde bir ret múlt ketip, qolda turǵan júldeden aıyryldy.
Qoryta kelgende, Beıjiń Olımpıadasy belgilengen merzimde, alaıda asa zor shekteýler aıasynda ótkizildi. Sheteldik týrıser Qytaı astanasyna bara alǵan joq. Qazaqstan quramasy 8 sport túrinen jarysqa túsip, salystyrmaly túrde short-trek, kónkımen júgirý jáne frıstaıl baǵdarlamalarynan táýir nátıje kórsetti.
Al shańǵymen júgirý, bıatlon, shańǵymen tuǵyrdan sekirý, taý shańǵysy sportynan kórsetkish tym tómen boldy. Tuńǵysh ret Olımpıadaǵa qatysqan shańǵy qossaıysynan da sportshymyz aıtarlyqtaı joǵary jetistikke jete almady.
Esten SABALAQ