Bilim berý baǵyttary boıynsha eń joǵary jumysqa ornalasý deńgeıi «Veterınarıa» baǵytynda.
Qazaqstanda joǵary bilim berý baǵdarlamalarynyń reıtıńi jasaldy, dep habarlaıdy Almaty-akshamy.kz
Onda naqty qandaı mamandyq boıynsha jumysqa turý kórsetkishi joǵary ekenin, jalaqy mólsherin de kórýge bolady.
Reıtıńti joǵary bilim jáne ǵylym mınıstrliginiń bastamasymen jasaldy. Osy jumysqa «Atameken» ulttyq kásipkerler palatasy da atsalysty.
Palatanyń basqarýshy dırektory Azamat Beısenbaevtyń aıtýynsha, reıtıńti ázirleý kezinde eki myńnan astam bilim berý baǵdarlamasy zerdelendi. Sondaı-aq, 80 myńdaı túlek, 200-den astam sarapshy men 100-ge jýyq oqý orny qamtyldy.
Negizgi talaptar: jumysqa ornalasý deńgeıi, ortasha jalaqy, bilim berý baǵdarlamalaryn akredıtasıasy men oqytýshylardyń sapasy.
Taldaý barysynda túlekterdiń aı saıynǵy zeınetaqy aýdarymdary da eskerildi.
«Bilim berý baǵyttary boıynsha eń joǵary jumysqa ornalasý deńgeıi «Veterınarıa» baǵytynda bolyp tur. Bul kórsetkish - 88 paıyz. Al densaýlyq saqtaý men áleýmettik qamsyzdandyrý boıynsha eń joǵary jalaqy tirkeldi. Osy salada túlekter birden aı saıyn 221 841 teńge alady, bul – medıandyq jalaqy*. Al «Óner jáne gýmanıtarlyq ǵylymdar» baǵytynda eń tómen ortasha jumysqa ornalasý deńgeıi tirkeldi», - dedi Beısenbaev Ortalyq komýnıkasıalar qyzmetinde ótken brıfıńte.
Reıtıńke sáıkes, Batys Qazaqstan oblysynyń túlekteri jumysqa ornalasý kórsetkishi boıynsha 86 paıyzdy kórsetti, ekinshi orynda Almaty oblysynyń túlekteri - 85 paıyz, úshinshi orynda Atyraý oblysynyń túlekteri - 84 paıyz.
Al Qyzylorda jáne Túrkistan oblystarynda eń tómen jumysqa ornalasý kórsetkishi - 73 paıyz tirkeldi.
«Eń joǵary jalaqyny Almaty oblysynyń túlekteri alatyny anyqtaldy, oblys boıynsha túlekterdiń oqý bitirgennen keıingi alǵashqy jyldaǵy medıandyq jalaqysy 196 769 teńgeni quraǵan. Eń tómen jalaqy Shymkent qalasynyń túlekterinde – 124 895 teńge», - dedi palata ókili.
Reıtıń mınıstrlik pen palatanyń saıtynda jarıalandy.
* Medıandyq jalaqy. Ol shartty túrde jalpy jalaqy shkalasyn ekige bólip, dál ortasyn kórsetedi. Azamattardyń jartysy osy somadan kóp, al ekinshi jartysy dál osy somadan az alady degendi bildiredi.