İİM málimetinshe, jańa normalardyń basty maqsaty – qoǵamdyq qaýipsizdikti arttyrý jáne beınebaqylaý kameralary arqyly tulǵany taný múmkindigin qamtamasyz etý, dep habarlaıdy aqshamnews.kz
Qazaqstanda bet-júzdi tolyq jabatyn kıim kıýge tyıym salý týraly zań normalaryna engizilgen túzetýler 12 shildeden bastap kúshine endi.
Tyıym balaklavaǵa, medısınalyq maqsattan tys maskaǵa, nıkabqa jáne adamnyń bet-álpetin anyq kórýge kedergi keltiretin ózge de kıim úlgilerine qatysty.
Degenmen zańda birqatar erekshelikter qarastyrylǵan. Bet-júzdi jabýǵa medısınalyq kórsetkishter boıynsha, aýa raıyna baılanysty, qyzmettik jáne eńbek mindetterin oryndaý kezinde, azamattyq qorǵanys sharalarynda, sondaı-aq sporttyq, mádenı jáne buqaralyq sharalar barysynda ruqsat etiledi.
İİM atap ótkendeı, tyıym adamnyń júzin jappaıtyn dinı kıimderge (hıdjab, sheıla, hımar, al-amıra) qatysty emes. Polısıa ókilderi jańa erejeler tek qana qoǵamdyq tártip pen qaýipsizdikti qamtamasyz etýge baǵyttalǵanyn, al azamattardyń quqyqtary men bostandyqtary, sonyń ishinde dinı senim bostandyǵy, buzylmaıtynyn erekshe atap ótti.