Otandasymyzdyń jeńisten keıingi pikiri
Tokıo Olımpıadasynda bokstan asa aýyr salmaqta synǵa túsetin Qamshybek Qońqabaev búgin ótken alǵashqy jekpe-jeginen soń óz oıyn ortaǵa saldy, dep habarlaıdy Almaty-akshamy.kz Olympic.kz-ke silteme jasap.
«Jekpe-jekte oıymdaǵy ádisterimdi 100 paıyz oryndaı almadym. Qansha degenmen, birinshi kezdesý, sondyqtan, qobaljý da joq emes. Bar kúsh-jigerimdi saldym jeńis úshin. Qarsylasym da osal emes, deneli, myqty ári boıshań.
Keıbir ádisterim jaqsy shyqsa, endi biri ótpeı qaldy. Sol úshin ár kezdesýge daıyn bolý kerek.
Kelesi qarsylasym da osal emes. Reseılik boksshymen sparrıngtik kezdesýler ótkizdim, biraq jarys kezinde bári de basqasha bolatyny anyq. Kópshiligi meni Ózbekstan namysyn qorǵaıtyn Bahador Jalolovpen kezdestirýge asyq. Biraq men úshin árbir qarsylas myqty. Sebebi, bul Olımpıada.
Keshe biraz jigittiń jarysty aıaqtaǵany da janymyzǵa batyp, kóńil-kúıimdi túsirdi. Dese de, elimizdi qýantýǵa daıynbyz, bar kúshimizdi salamyz», - dedi Qamshybek.