Aýrýhanadaǵy neıroreabılıtasıa bólimi 2020 jyly ashylǵan bolatyn. Sol ýaqyttan beri 1000-nan astam adam ońaltýdan ótti.
Almatylyqtar mindetti áleýmettik medısınalyq saqtandyrý sheńberinde №7 qalalyq klınıkalyq aýrýhananyń neıroreabılıtasıa bóliminde ońaltýdyń ekinshi kezeńinen óte alady, dep habarlaıdy Almaty-akshamy.kz aýrýhananyń baspasóz qyzmetine silteme jasap.
Mıdaǵy qan aınalymynyń buzylýy saldarynan ınsýlt alǵan Nurjamal Omarova 7-shi aýrýhananyń ınsýlt bóliminde emdelgen. Keıin densaýlyǵyn qalpyna keltirý úshin osy mekemeniń neıroreabılıtasıa bólimine joldama berildi.
Bólim meńgerýshisi Aınur Dosybaevanyń aıtýynsha, aýrýhanaǵa túsken kezde pasıent bireýdiń kómeginsiz júre almaıtyn. Insýlt saldarynan qoly aýyryp, oń qolyndaǵy bulshyq etteri jansyzdanyp qalǵan.
«Ekinshi kezeńdegi ońaltý kýrsynan ótkennen keıin, ol taıaqqa súıenip júre bastady, aıaǵyn nyq basyp, qoldaǵy bulshyq etter qataıdy. Denedegi aýyrsyný basylyp, emosıonaldyq jaǵdaıy jaqsardy, emdi jalǵastyrýǵa degen qulshynysy artty», - deıdi maman.
«Reabılıtasıadan ótip, densaýlyqty qalpyna keltirýge múmkindik jasalǵanyna rızamyn. 7-shi aýrýhananyń ońaltý bóliminde qabyldaǵan emniń arqasynda densaýlyǵym túzele bastady. Jaǵdaıym edáýir jaqsaryp, ózdigimmen júrip-turatyn boldym, tamaqty ózim jeımin. Bólimshe qyzmetkerlerine aıtar alǵysym sheksiz», - deıdi Nurjamal Omarova.
Aýrýhanadaǵy neıroreabılıtasıa bólimi 2020 jyly ashylǵan bolatyn. Sol ýaqyttan beri 1000-nan astam adam ońaltýdan ótti. Bul jerde mıyna jáne julynyna operasıa jasatqan, mıdaǵy qan aınalymy qyzmetiniń buzylýynan ınsýlt alǵan pasıentter reabılıtasıanyń 2-kezeńinen óte alady. Olar munda Almatydan ózge de óńirlerdegi aýrýhanalar men emhanalardan túsedi.
Ońaltýdan qalaı ótedi?
Josparly túrde em qabyldaıtyn pasıent stasıonarǵa «Aýrýhanaǵa jatqyzý búrosy» portaly arqyly jatqyzylady. Buryn kópshilik jaǵdaıda aqyly túrde kórsetiletin ońaltýdan qazir saqtandyrylǵan azamattar ınsýlt alǵannan keıin nemese otadan soń 9 aı ishinde óte alady.
Densaýlyqty qalpyna keltirýge baǵyttalǵan em-dom kýrsy qalaı júrgiziledi?
Bólimshede negizinen reabılıtasıanyń Bota, PNF syndy ádisteri, ergoterapıa qoldanylady. Olar aıaq-qoly jansyzdanyp, sal bolyp qalǵan pasıentterdiń ózdiginen júrip-turý qabiletin qalpyna keltirýge múmkindik beredi. Jattyǵýlar arnaıy qondyrǵylarmen jabdyqtalǵan kınezıoterapıa zalynda ótedi.
Sonymen qatar, fızıoterapıanyń magnıtti terapıa, parafındi aplıkasıa, elektroforez, SMT, bıoptron, ÝVCH, massaj syndy túrleri men gıperbarıkalyq oksıgendi terapıa, ınemen emdeý syndy saýyqtyrý tásilderi jan-jaqty qoldanylady. Sonymen qatar, pasıentterge psıhoterapevt pen logoped mamandar kómek kórsetedi.
Esterińizge sala ketsek, medısınalyq ońaltý úsh kezeńnen turady.
Ońaltýdyń 2-kezeńi aýrýhanalardyń mamandandyrylǵan bólimshelerinde nemese respýblıkalyq densaýlyq saqtaý uıymdarynyń, mamandandyrylǵan ońaltý ortalyqtary men kópbeıindi stasıonarlar bazasynda ótedi. Bul kezeńde emdi aýrý bastalǵan sátten bastap 9 aı ishinde júrgizý qajet. Kýrstyń uzaqtyǵy men jıiligi nozologıaǵa, naýqastyń densaýlyq jaǵdaıyna taǵy da basqa faktorlarǵa baılanysty bolmaq.