Jańa ınstıtýt paıda bolady.
QR Memlekettik hatshysy Erlan Qarın Youtube arnasynda konstıtýsıalyq reforma týraly kezekti vıdeo jarıalady, dep habarlaıdy Almaty-akshamy.kz QazAqparatqa silteme jasap.
Konstıtýsıalyq reforma qarapaıym halyqqa ne beredi? Saıasattan alys qarapaıym turǵyndar budan ne utady? Konstıtýsıalyq túzetýlerdiń halqymyzǵa qandaı paıdasy bar?
Bul jolǵy rolıkte Memlekettik hatshy osy suraqtarǵa jaýap berýge tyrysqan.
«Bul reformanyń oń áserin elimizdiń búkil azamaty sezinetin bolady. Birinshi. Konstıtýsıalyq keńes Konstıtýsıalyq sot bolyp qaıta qurylady. Ol osy organnyń ataýy ǵana ózgeredi degen sóz emes. Quzyry odan áldeqaıda aýqymdy, múlde basqa, jańa ınstıtýt paıda bolady. Konstıtýsıalyq sot Ata zańǵa qaıshy keletin kez kelgen zańnyń nemese ózge de quqyqtyq aktiniń kúshin joıa alady», - deıdi Erlan Qarın.
Sondaı-aq, ol Konstıtýsıalyq sotqa júginý tártibi qalaı retteletinin túsindirdi.
«Konstıtýsıalyq sotqa Prezıdent, Senat pen Májilis tóraǵalary, Parlament depýtattarynyń kem degende besten biri, Premer-Mınıstr, Adam quqyqtary jónindegi ýákil, Bas prokýror jáne eń bastysy, elimizdiń kez kelgen azamaty júgine alady. Iaǵnı, kez kelgen azamat qandaı da bir normatıvtik akt onyń Konstıtýsıada bekitilgen bostandyqtary men quqyqtaryn shekteıdi dep sanasa, Konstıtýsıalyq sotqa shaǵymdana alady. Mundaı quqyqtardyń aýqymy keń. Konstıtýsıalyq sottyń sheshimi qabyldanǵan kúnnen bastap kúshine enedi jáne elimizdiń búkil aýmaǵynda jalpyǵa mindetti sanalady. Mundaı túpkilikti sheshimderge shaǵym keltirýge bolmaıdy», - dedi Memlekettik hatshy.
Buǵan deıin 5 maýsymda ótýi josparlanǵan referendýmdaǵy halyqaralyq baıqaýshylardy tirkeý 30 mamyrǵa deıin jalǵasatyny aıtylǵan bolatyn.