Búgin QR Ekologıa jáne tabıǵı resýrstar mınıstri E.Nysanbaev Lıtva Respýblıkasynyń Qazaqstan Respýblıkasyndaǵy Tótenshe jáne Ókiletti Elshisi E. P. Egıdıýs Navıkaspen kezdesti.
Kezdesý barysynda Taraptar qaldyqtardy basqarý salasyndaǵy yntymaqtastyq jáne saýda-ekonomıkalyq yntymaqtastyq jónindegi qazaqstan-lıtva úkimetaralyq komısıasynyń aldaǵy 14-shi otyrysyn ótkizý týraly pikir almasty. Sondaı-aq, Lıtva tarapy sýsyndar bótelkeleri úshin depozıtterdi qaıtarýdyń (Deposite Refund System) nátıjeli tehnologıasyn usyndy, dep habarlaıdy almaty-akshamy.kz.
E.Nysanbaev óz sózinde atap ótkendeı, Qazaqstan Ekologıa jáne qorshaǵan ortany qorǵaý salasynda, atap aıtqanda qaldyqtardy basqarý salasynda ozyq tájirıbesi bar Lıtvamen yntymaqtastyqty damytýǵa múddeli.
Búgingi tańda Qazaqstanda qorshaǵan ortany qorǵaý salasyndaǵy ózekti baǵyttardyń biri komýnaldyq qaldyqtardy basqarý bolyp tabylady. 2030 jylǵa deıin qazaqstandyq tarap qaıta óńdeý deńgeıin 40% - ǵa deıin jetkizýdi josparlaıdy.
Osyǵan baılanysty, Parıj kelisimi sheńberinde, onyń ishinde qaldyqtar sektory boıynsha shyǵaryndylardy azaıtý jónindegi Qazaqstan mindettemelerin eskere otyryp, biz Lıtvanyń qaldyqtardy basqarý júıesin jolǵa qoıý, atap aıtqanda depozıttik-qaıtarý júıesin damytý jónindegi tájirıbesin zerdeleýge múddelimiz.
Mınıstr komısıa otyrysy barysynda Tarapdartyń sarapshylary qaldyqtardy basqarý salasyndaǵy joǵaryda atalǵan tájirıbeni talqylaı alatynyn atap ótti.
Kezdesý qorytyndysy boıynsha Taraptar lıtvalyq sarapshylardyń Qazaqstanǵa saparyn uıymdastyrý jáne múddeli taraptardyń kezdesýlerin ótkizý arqyly osy másele boıynsha ózara is-qımyldy jalǵastyrýǵa ýaǵdalasty.