Qurylys kompanıalary qalanyń bas josparyna baǵynbaıdy.
Bul máseleni sáýlet jáne qala qurylysynyń ózekti túıtkilderi talqylanǵan brıfıń barysynda sáýletshi Alekseı Abılov kóterdi, dep habarlaıdy QazAqparat tilshisi.
«Bizdiń elde qalanyń bas jospary óz betinshe, al salynyp jatqan nysandar óz betinshe júredi. Qurylys kompanıalary bas josparǵa baǵynbaıdy. Osylaısha, shynaıy ómirde turǵyndardyń ómir súrýine qolaısyz nysandar boı kóteredi. Josparda qanshama esepteýler men boljamdar kórsetiledi. Degenmen, ony syzyp bolǵan soń, «qalǵan is bizdiń sharýamyz» dep qurylysqa qarjy quıatyn ınvestorlar kirisedi. Bul jerde naryqtyq ekonomıkaǵa basymdyq berilip ketedi. Bul durys emes. Muny ózgertý kerek. Óıtkeni, shahardyń bas jospary sol aýmaqta turatyn adamdardyń aldaǵy ómir súrý ortasyn qalyptastyrady. Qazir kóp qabatty úıler, tyǵyz ornalasqan nysandar kóbeıip ketti. Elimizdiń iri úsh qalasyndaǵy qurylys adamdarǵa emes, kólikterge arnalyp salynyp jatqan sıaqty. Saıabaq, mektep, balabaqsha, dúken, balalar oınaýǵa arnalǵan oryndar men ózge de qajetti áleýmettik nysandar eskerilmeıdi. Bas josparǵa baǵynbaı, óz qalaýymen qurylys júrgizetin kompanıalardy jazalaý kerek. Ol úshin zańǵa ózgeris engizý qajet dep esepteımin», - dedi Alekseı Abılov.
Eske sala keteıik, 1 tamyzdan bastap Almatyda Qala qurylysy keńesi jumysyn bastaıdy.