— «Almaty tulǵalary» jobasynyń basty maqsaty — maqsaty aıqyn azamattardy anyqtaý jáne qoldaý. Biz osyndaı talantty ári úlgili adamdarymyz bar ekenine maqtanamyz. Olardyń qala damýyna qosqan úlesin yntalandyrý óte mańyzdy dep sanaımyn. Árqaısymyz Almatyny jaqsarta alatynymyzdy túsinýimiz kerek. Bul baıqaý — turǵyndarǵa óz jetistikteri men bastamalaryn úlgi retinde kórsetýge tamasha múmkindik. Baıqaý alǵash ret 2022 jyly ótkizildi jáne qala turǵyndarynyń úlken qyzyǵýshylyǵyn týdyrdy. Bizge kóptegen ótinishter kelip tústi, bul bastamanyń suranysqa ıe ekeniniń kórinisi. Bıyl jobany qaıta ótkizýge sheshim qabyldadyq, óıtkeni biz tabysqa jetýge umtylatyn jáne óz tájirıbesimen bóliskisi keletin adamdardy qoldaýdy jalǵastyramyz, — dedi Almaty qalasy Qoǵamdyq damý basqarmasynyń Qoǵamdyq damý ortalyǵynyń arnaıy jobalardy iske asyrý bóliminiń jetekshisi Ásel Erbolatova.
«Almaty tulǵalary» jobasy aıasynda jetistik pen tabys ıdeıalaryn nasıhattap, súıikti qalamyzdyń damýy men gúldenýine úles qosqan qala turǵyndarynan 100-den astam ótinim tústi. Muqtaj jandarǵa qol ushyn sozyp, týǵan qalasynyń ıgiligi úshin eńbek etip júrgen, ortaq adamgershilik qundylyqtardy nasıhattaǵan jobaǵa konkýrstyq komısıa arqyly iriktelip, úzdik dep tanylǵan 5 tulǵa «Urpaq tálimgeri», «Ulaǵatty ustaz – úzdik shákirt», «Qaıyrymdy kásipker», «Úzdik baǵban – úlgili azamat», «Úzdik volonter – meıirimdi jan» nomınasıalary boıynsha marapattaldy. Sonymen qatar, baıqaý jeńimpazdaryna dıplomdar men syılyqtar tabystaldy.
Jeńimpazdar qatarynda QR Mádenıet qaıratkeri Gúlshara Esetqyzy jobanyń mańyzdylyǵyn atap ótti:
— Qoǵamdyq damý basqarmasynyń Qoǵamdyq damý ortalyǵy erekshe jobalar jasap jatyr. Bul damýshy qoǵam úshin óte mańyzdy. Joba — eńbegi elenbeı júrgen, qalamyzdyń ártúrli sala qyzmetkerlerine nazar aýdaratyn bastama. Aldaǵy ýaqytta da kóptegen jobalar bolady dep úmittenemin, — dedi ol.