Almaty qalasyndaǵy aýdandardyń birinde “Ýchaske” jedel-profılaktıkalyq is-sharasy aıasynda jergilikti is-shara ótkizildi.
Onyń maqsaty – tıisti quqyqtyq tártipti qamtamasyz etý, kósheler men qoǵamdyq oryndarda qylmystyń aldyn alý jáne jolyn kesý. Jergilikti is-shara qalanyń Alataý aýdanynda da júrgizildi. Oǵan 100-den astam krımınaldyq jáne ıývenaldyq polısıa qyzmetkeri, ýchaskelik polısıa ınspektory, JQAJ jáne patrúldik polısıa qyzmetkeri qatysty, dep habarlaıdy aqshamnews.kz Polisia.kz-ke silteme jasap.
– Sonymen qatar aýdandaǵy qylmystyq ahýaldy eskere otyryp, 20 jaıaý jasaqtyń baǵyty ázirlendi. Júrgizilgen reıdtik is-sharalardyń eki kúniniń ishinde 184 quqyq buzýshylyq anyqtaldy, onyń ishinde 28 usaq buzaqylyq, 18 temeki shegýge tyıym salý, 5 alkogóldik ónimderdi satý, úı janýarlaryn serýendetý erejesin buzýǵa qatysty 19 derek anyqtaldy. Sondaı-aq kámeletke tolmaǵandardyń túngi ýaqytta eresekterdiń qaraýynsyz júrýine qatysty 27 derek belgili boldy, – dedi Almaty qalalyq PD jergilikti polısıa qyzmeti basqarmasynyń bastyǵy Serik Shýmaev.
Tájirıbe boıynsha jasalǵan qylmystyń jartysynan kóbi zańsyz júrgen sheteldikter tarapynan jasalady. Osyǵan baılanysty is-shara kúnderinde polıseıler Almaty qalasyna kórshiles memleketterden jáne respýblıkanyń basqa óńirlerinen keletin adamdarǵa baqylaýdy kúsheıtti. Sonymen qatar kóshi-qon polısıasynyń qyzmetkerleri qalada zańsyz turyp jatqan shetel azamattarynyń shoǵyrlaný oryndaryn, atap aıtqanda, qonaq úılerdi, jaldamaly páterlerdi, oqý oryndary men kásiporyndardyń jataqhanalaryn, qurylys nysandaryn tekserdi.