Ulttyq quryltaıdaǵy oılar men usynystar
Qazaqstan Jazýshylar odaǵynda ótken shyǵarmashylyq qaýym ókilderiniń basqosýynda Memleket basshysy Qasym-Jomart Toqaevtyń qatysýymen Býrabaıda uıymdastyrylǵan Ulttyq quryltaıdyń tórtinshi otyrysynda kóterilgen máseleler keńinen talqylandy. Qoǵamdy tolǵandyryp otyrǵan rýhanı, mádenı jáne áleýmettik taqyryptar tóńiregindegi pikirler qalamgerler tarapynan qoldaý taýyp, mańyzdy usynystar aıtyldy. Bul týraly Aqshamnews.kz saıty habarlaıdy.
Ulttyq quryltaı – jańǵyrý men jańarý alańy
Jıyndy ashqan Qazaqstan Jazýshylar odaǵy Basqarmasynyń tóraǵasy Mereke Qulkenov Quryltaıdyń bul jolǵy otyrysynda azamattyq qoǵam, mádenıet, bilim, ǵylym jáne áleýmettik damý syndy salalardaǵy júıeli ózgeristerge negiz bolatyn máseleler kóterilgenin aıtty. Ol Memleket basshysynyń sóılegen sózin baǵdarlamalyq mańyzǵa ıe dep baǵalap, Prezıdent usynǵan basym baǵyttar eldiń rýhanı jańǵyrýymen tyǵyz baılanysty ekenin atap ótti.
"Quryltaı – tek pikir almasý alańy ǵana emes, bul – eldik máselelerdi sheshýdiń, jańǵyrýdyń jáne jańarýdyń naqty joly", – dedi Mereke Qulkenov.
Quryltaıda aıtylǵan usynystardyń memleket deńgeıinde qoldaý tabýy, ásirese onomastıka salasyn jetildirý, áleýmettik keseldermen kúres, azamattyq qoǵamdy damytý, qoǵamdyq sana men qundylyqtardy jańǵyrtý syndy baǵyttardyń ózektiligine toqtaldy.
Qalamgerlerdiń pikirleri: ulttyq qundylyqtardy saqtaý – basty mindet
Jıynda sóz alǵan jazýshylar men ádebıettanýshylar – Kádirbek Segizbaev, Qýandyq Túmenbaı, Júsipbek Qorǵasbek, Qudıar Bilál, Baqytjan Qanapıanov, Almas Ahmetbek, sondaı-aq synshylar Qanseıit Ábdezuly men Álıa Bópejanova eldiń rýhanı damýynda qalamgerlerdiń orny erekshe ekenin atap ótti.
Olar qoǵamda jıi kezdesetin alaıaqtyq áreketter, teris dinı aǵymdar, ulttyq bolmysqa jat ıdeologıalar sıaqty keri qubylystarǵa qarsy kúreste shyǵarmashylyq qaýymnyń belsendi bolýy tıis ekenin jetkizdi. Sonymen qatar, otandyq kıno men anımasıa óndirisine ıdeologıalyq turǵydan sapaly mazmun engizýdiń mańyzdylyǵy aıtyldy.
Prezıdent sózi – baǵyt berýshi qujat
Qalamgerler Qasym-Jomart Toqaevtyń:
«Biz barshaǵa jáne árkimge zor múmkindik beretin memleket quryp jatyrmyz. Bul – ár azamat óz qabiletin shyńdap, adal eńbegimen otbasyn asyraı alatyn el bolý degen sóz. Zań jáne tártip – bizdiń myzǵymas tuǵyrymyz. Al bizdiń ıdeologıamyz – jahandaǵy asa kúrdeli geosaıası ahýalda elimizdi jańa damý deńgeıine kóterý úshin berik negiz qalaý» degen sózin erekshe mánmen qabyldady.
Bul málimdeme el damýynyń jańa kezeńine serpin beretin negizgi ustanym retinde baǵalanyp, ádiletti ári qaýipsiz qoǵam qurý jolynda barlyq azamattardyń belsendi ról atqarýy qajettigin kórsetti.
Qalamgerler men shyǵarmashylyq ıntellıgensıa ókilderiniń oı-pikiri el bolashaǵy úshin mańyzdy ıdeologıalyq, mádenı, áleýmettik máselelerdi kóterip, ulttyq qundylyqtardy saqtap, jańǵyrtýǵa baǵyttalǵan naqty usynystarmen tolyqty. Ulttyq quryltaıda aıtylǵan ıdeıalar men bastamalar – jańa Qazaqstandy qalyptastyrý jolyndaǵy naqty qadamdardyń kórinisi.