«Almatybasjospar» ǴZI alańynda Bahreın ýnıversıtetiniń arhıtektory, PhD profesory Islam Hamdı Elgonaımı, Cushman & Wakefield kompanıasynyń Qazaqstandaǵy seriktesi ári basshysy, Almaty qala qurylysy keńesiniń múshesi Gúlshat Sarıevanyń qatysýymen «Jasyl sáýlet» jáne «Qalalyq jylý araly» taqyrybynda halyqaralyq semınar ótti, dep habarlaıdy almaty-akshamy.kz.
Semınardy ashqan «Almatybasjospar» ǴZI bas dırektory Asqat Sádýov jahandyq jylynýdyń búkil álemde ótkir turǵan másele ekenine erekshe toqtaldy. BUU Qorshaǵan ortany qorǵaý baǵdarlamasynyń málimetinshe, búginde ortasha táýliktik temperatýrasy 25°C-tan joǵary jerlerde turatyn 2,8 mıllıard adamnyń 8 paıyzy ǵana kondısıonerge qol jetkize alady eken. Jahandyq jylynýdy tejeý quralynyń biri – qalalardaǵy jasyl arhıtektýrany damytý. Sonymen qatar, qoǵamdyq kólikti damytý onyń ekologıalyq taza bolýyna (LRT, metro) basa nazar aýdara otyryp, kólik qańqasyn qalyptastyrý jeke avtokólikti paıdalaný qajettiligin azaıtady. Bul jáıt, álbette, ekologıaǵa oń áser etedi
«Jasyl arhıtektýrada «aqyldy» tehnologıalardy kóbirek qoldaný qajet. Bul quraldar sýdy, elektr qýatyn únemdeýge, sondaı-aq kómirqyshqyl gazynyń qaldyǵyn azaıtýǵa múmkindik beredi. Osy tehnologıany ıntegrasıalaýda, resýrstardy bólýdi ońtaılandyrý men qalalyq kógaldandyrýdyń turaqtylyǵyn arttyrýda landshaft sáýletshileriniń erekshe rólin atap ótkim keledi», – deıdi sheteldik sarapshy Islam Hamdı Elgonaımı.