Almaty - myń boıaýly qala.
Shahar týyn jelbiretken jastar elektrosamokatpen megapolıstiń basty kóshelerimen 40 shaqyrym joldy júrip ótti, dep habarlaıdy Almaty-akshamy.kz Almaty.tv-ge silteme jasap.
Etnomádenı birlestiktiń ókilderi Qala kúnin merekeleý aıasynda megapolıstegi kórikti oryndarǵa baryp, selfı ekskýrsıa jasady. Elektrosamokat mingen jastar Táýelsizdik monýmenti, Uly Abaı men Qurmanǵazynyń eskertkishine, qalanyń kóne ǵımarattary men basty saıabaqtaryna at basyn buryp, shahar týyn jelbiretip sýretke tústi.
Shahar týyn jelbiretken jastar elektrosamokatpen megapoıstiń basty kóshelerimen 40 shaqyrym joldy júrip ótti. Jastar Respýblıka alańyndaǵy Táýelsizdik monýmentinen shyǵyp, Dostyq úıi, Qazaqstan qonaqúıi, Respýblıka saraıy syndy 7 mekenjaıǵa bardy.
«Almaty - myń boıaýly qala. Bul árbir qonaqtyń júreginde iz qaldyratyn jarqyn shahar der edim. Aksıany Qazaqstan halqy Assambleıasyna múshe jastar uıymdastyryp otyrmyz. Osy is-sharany jyl saıynǵy dástúrge aınaldyrǵymyz keledi. Sebebi qazir, ózderińiz biletindeı, elektrosamokatpen qozǵalatyn turǵyndar kóbeıdi. Sondaı-aq, bul ekologıalyq transport túri», - dedi «Qazaqstan uıǵyr jastarynyń odaǵynyń» tóraǵasy Rýstam Qaıyrev.
Denıel Djeıms Almatyda týyp-ósti. Afrıkalyq etnomádenı qoǵamdastyqtyń tóraǵasy qazaq tilinde erkin sóıleıdi. Aıtýynsha, basqa jaqqa qonys aýdarý oıy joq. Almatynyń aspanmen talasqan zańǵar taýlary, san qubylǵan aýa raıy jáne tabıǵatynyń keremetteı kórinisi unaıdy eken.
«Almaty qalasynda týyp óstim. Ol - meniń eń súıikti qalam. Nege deseńiz, óıtkeni 4 mezgil bar. Qysta qar jaýyp tur. Afrıkalyq adamdarǵa ol erekshe nárse. Kóktemde bári gúldenedi. Jazda ystyq Afrıkadaǵy sıaqty. Kúzde mynaý tabıǵat, japyraqtar sarǵaıady, sondaı ádemi tabıǵat. Bir qadam basyp, taýǵa shyǵýǵa múmkindik bar. Qandaı bıik taýlarymyz bar», - dedi Afrıkalyq etnomádenı qoǵamdastyqtyń basshysy Denıel Djeıms.
«Oqý izdep kelgen men osy qalaǵa ǵashyq bolyp, osynda qalýdy uıǵardym. Almaty - óte ásem, taza qala. Óziniń atmosferasymen baýrap alatyn erekshe qala dep aıtsam bolady. Basqa qalalarǵa qaraǵanda ózime Almaty qatty ystyq», - dedi Orys etnomádenı birlestiginiń múshesi Galına Sergeevna.
Olardyń fotosýretteri men shaharǵa arnaǵan júrekjardy tilekterin áleýmettik jelilerde Almaty súıikti qala heshtegi arqyly tabýǵa bolady. Ekskýrsıa qatysýshylary barsha almatylyqtardy aksıaǵa qatysýǵa shaqyrady.
Aksıa osy ortalyq demalys saıabaǵynda támamdaldy. Qaladaǵy is-sharalar bunymen ǵana toqtap qalmaıdy. Uıymdastyrýshylar aldaǵy kúnderi de kórneki oryndarǵa baryp, qala turǵyndary men qonaqtaryna merekelik kóńil kúı syılaıdy.