Konsertke sheteldiń óner ıeleri de qatysty.
«Almatym - altyn besigim» atty konsertte Slaván bazarynyń jeńimpazdary, tanymal kúıshiler men jas ánshiler óner kórsetti, dep habarlaıdy Almaty-akshamy.kz Almaty.tv-ge silteme jasap.
Mádenıet oshaǵy - Almatyda ónerpazdar Qala kúnine arnalǵan ystyq lebizi men mahabbatyn ánmen jetkizdi. Alataý dástúrli óner teatrynyń sahnasynda qazaqtyń qyzyl arsha dombyrasy kúmbirlep, kúmis kómeı ánshiler men myń buralǵan bıshiler óner kórsetip, merekelik kóńil-kúı syılady.
«Almatym - altyn besigim» atty konsertte Slaván bazarynyń jeńimpazdary, tanymal kúıshiler men jas ánshiler óner kórsetti. Merekelik sharaǵa atsalysqandar barsha qala turǵynyn egemendiktiń 30 jyldyǵymen qatar Qala kúnimen quttyqtady.
«Súıikti qalamyz Almatynyń týǵan kúni! Barlyq almatylyqtardy osy merekemen shyn júrekten quttyqtaımyn. Ómirlerińizde sátti, shýaqty kúnder kóp bolsyn degen tilek aıtamyn. Aman bolaıyq, eń bastysy, aýyrmańyzdar», - dedi kúıshi Aıgúl Úlkenbaeva.
«Osy meniń eń súıikti qalamnyń biri - Almaty qalasy. Ońtústigimizdiń astanasy órkendep óse bersin! Óner men bilim ordasy bola bersin», - dedi ánshi Ernar Sadyrbaev.
Tarıhy tereń Almaty qalasynyń kúnine arnalǵan konsertke sheteldiń óner ıeleri de qatysty. Olar alash jurtyn merekemen quttyqtady.
«Barsha almatylyqtardy Qala kúnimen quttyqtaımyn! Almaty gúldep, jaınaı bersin!» - dedi Erevan qalasy memlekettik mádenıet jáne óner kolejiniń dırektory Vrej Kırakosán.
«Bári Otanǵa, Almaty kúnine baılanysty. Mysaly, Almatynyń gúli men almasyna baılanysty kesh ótpek. Keshte «Boztorǵaı» baıqaýynyń jeńimpazdary men kishkentaı balalar óner kórsetedi», - dedi mádenıet qaıratkeri Qarlyǵash Ábdikárimova.
Merekelik konsert qaladaǵy epıdemıologıalyq ahýalǵa baılanysty kórermensiz ótti. Keshtiń tolyq nusqasyn Almaty arnasynyń efırinen kóre alasyzdar.