Qala turǵyndary kútimsiz aǵash kóshetteriniń solyp jatqanyna alańdaýly
Dál qazirgi ýaqyt - shahardaǵy maýsymdyq máselelerge kóńil bóletin kez. Sebebi, kún jylyna bastaǵannan-aq Almatyda kógaldandyrý jumystary qarqyn alady. Qalanyń barlyq aýmaǵynda aǵashtar jyl saıyn otyrǵyzylady. Tıisti mamandar aǵash kóshetterin otyrǵyzǵanmen, solardyń sońynan jańa óskinderdi kútip-baptap júrgenderdi kórý muń. Bizdiń búgingi aıtpaǵymyz - almatylyqtardy alańdatqan qorshaǵan ortanyń qazirgi ahýaly. Qyrýar aqshaǵa satyp alynǵanymen, kútimi kem bolyp, qýrap jatqan aǵashtardyń jaǵdaıy, dep habarlady Almaty-akshamy.kz.
BOSTANDYQ AÝDANY
Sý jetpeı qýrap jatyr
Redaksıamyzǵa hat joldaǵan almatylyq Gúlnar Tımırázev, Baıtursynov kósheleri men Seıfýllın dańǵyly aralyǵyndaǵy qýrap qalǵan týıa aǵashtarynyń sýretin salypty.
– Bul aǵashtardy 2020 jyly otyrǵyzǵan. Biraq eshqaısysy durys kútim bolmaǵan soń, kóktep, kógere almady. Tamyryna sý jetpegen soń, olar da tirshilik ıesi ǵoı, qýramaǵanda qaıtsin, – degen Gúlnar:
– Jasyl beldeý qalyptastyrýda iske aspaı qalǵan jumystar bul ǵana emes, qýraǵan aǵashtar Almatynyń barlyq aımaǵynda kezdesedi. Búdjetten bólingen qanshama qarajat osylaı jelge ushyp jatyr, – dep bazynasyn aıtty.
Týıa aǵashtarynyń nege qýrap ketkenin bilmek maqsatpen biz Bostandyq aýdany ákimdigine habarlasqanymyzda, olardan mynadaı aqylǵa qonymsyzdaý, birtúrli jaýap keldi: «Almaty qalasy Bostandyq aýdany ákiminiń apparaty Tımırázev kóshesi men Baıtursynov kóshesi qıylysynda ornalasqan jasyl jelekterdi sýarý máselesi jónindegi ótinishti qarap, FORUM Almaty oıyn-saýyq ortalyǵynyń ákimshiligimen túsindirý jumystaryn qolǵa aldy. Nátıjesinde ortalyq basshylyǵynyń kúshimen jasyl jelekterdi sýarý jumystarynyń júrgizilgenin habarlaıdy». Aqparatpen birge jumysshylardyń qýraǵan aǵashtardy sýaryp júrgen sýretin qosa joldaǵan. «Bolary bolyp, boıaýy sińgennen keıin, qýraǵan aǵashtarǵa mundaı «qamqorlyqtyń» qajeti shamaly ǵoı. Desek te, ákimdik tarapynan berilgen jaýap «is bitti, qý kettiniń» kebin kıip turǵandaı.
ALMALY AÝDANY
Gúlderdiń solmaǵanyn qalaımyn
Qala turǵyny Gúlim Baǵdatqyzy Gandı saıabaǵyndaǵy raýshan gúlderi egilgen baqtyń retke keltirilýin suraıdy.
– Saıabaqtaǵy kútimsiz, sáni ketip turǵan gúlderge kóńil bóletin ýaqyt keldi. Aramshópterden tazartyp, ýaqytyly kútip-baptaý kerek, – deıdi Gúlim. – Jalpy, bul gúlzarlardy sýarý, olarǵa sanıtarlyq kútim jasap, kesý/óńdeý jumystaryn júrgizetin arnaıy keste bar ma? Buǵan kim jaýapty? Jaqsy kútim bolsa, raýshandar jaz boıy gúldeıdi jáne qar jaýǵanǵa deıin bizdi óziniń sulýlyǵymen hám hosh ıisimen qýantady. Men saıabaqtaǵy raýshan gúlderiniń saqtalyp, jaqsarǵanyn qalaımyn.
Almaly aýdanynyń ákimdigi «aýdan aýmaǵyndaǵy jasyl aımaqtardy kútýmen «LEÝ fırmasy» JSHS merdigerlik uıymy aınalysady. Sýarý jáne kútý jumystary jumys kestesine sáıkes júrgizilýde jáne turaqty baqylaýda» dep jaýap berip otyr.
Ázirge atalmysh mekeme qaladaǵy eń myqty gúl ósirýshilerdiń biri retinde tanylyp júr. Endi olar jasyl jelekterdi baptaýdaǵy sheberlikterin Gandı saıabaǵynda da kórsetedi dep úmittenemiz.
TÚRKSİB AÝDANY
Jaz ótip, kúz kelgendeı…
Qaıran, aǵashtar-aı! Býrennyı kóshesimen Baıkalskaıa kósheleriniń qıylysyndaǵy aǵashtarǵa qarasań, quddy bir jaz ótip, kúz kelgendeı… Ýaqytynda durys kútim kórmeı, dárilenbegen aǵash osyndaı kúı keshpegende qaıtsin!
Ádette biz aǵashtardy tabıǵatta aýa tazalaýshy retinde jaqsy bilemiz. Jasyl jelektiń odan bólek, adam psıhıkasy men kóńil kúıin kóterýge de áseri zor. Aǵashtardy dereý emdeý kerek