Almatydaǵy belsendi uzaq ómir súrý ortalyǵyna egde jastaǵy 12 myń adam barady
Megapolıste barlyǵy 10 belsendi uzaq ómir súrý ortalyǵy bar, olardyń 9-y aýdandarda ornalasqan. Ótken jyly qalalyq ortalyq ashylǵan bolatyn. Bul týraly Almaty qalasynyń Jumyspen qamtý jáne áleýmettik baǵdarlamalar basqarmasy men «Belsendi uzaq ómir surý ortalyǵynyń» ókilderi Almaty qalasynyń Óńirlik komýnıkasıalar qyzmetiniń alańynda sóz etti.
Spıkerlerdiń sózinshe, ortalyqtarda ótken jyly 33 myń zeınetker tirkelgen, 649 myńnan astam túrli qyzmet túrleri kórsetilgen. Bıyl 219 myń qyzmet kórsetildi.
«Belsendi uzaq ómir súrý ortalyqtarynyń negizgi basymdyqtarynyń biri - qart adamdardyń densaýlyǵyn kútý. Árbir ortalyqtyń shtatynda dáriger, psıholog, nýtrısıolog jáne gerontolog bar, belsendi uzaq ómir súrý ortalyqtary sapaly medısınalyq kómek pen keńeıtilgen knsýltasıalar berý úshin medısınalyq uıymdarmen jáne medısınalyq joǵary oqý oryndarymen belsendi yntymaqtastyqta jumys jasaıdy. Sondaı-aq, biz fızıkalyq belsendilik jattyǵýlaryn uıymdastyramyz, salaýatty ómir saltyn nasıhattaıtyn jáne aýrýlardyń aldyn alýǵa baǵyttalǵan is-sharalar ótkizemiz», - dedi Almaty qalasy Jumyspen qamtý jáne áleýmettik baǵdarlamalar basqarmasy basshysynyń orynbasary Qalıbek Aqylbekov.
Almaty qalasynyń «Belsendi uzaq ómir súrý ortalyǵynyń» dırektory Sáýle Beketaevanyń aıtýynsha, jobanyń maqsaty – qart adamdardyń bos ýaqyttaryn tıimdi uıymdastyrý, áleýmettik-medısınalyq kómek kórsetý jáne olardy belseni shyǵarmashylyq jáne qoǵamdyq ómirge tartý.
«Búgingi tańda belsendi uzaq ómir súrý ortalyqtary Almatynyń barlyq aýdandarynda jumys isteıdi, bul qoǵamdyq ómirdiń túrli salalaryna qatysatyn qart adamdardyń aýqymyn keńeıtýge, belsendi azamattardyń kóbeıýi men olardyń ómir sapasynyń artýyna múmkindik berdi. Jastary egde tartqan adamdarǵa arnalǵan ortalyqtar ashý arqyly biz de Japonıa elindegi sıaqty jetistikterge jete alamyz. Japondyqtardyń ortasha ómir súrý jasy – 84,2, al Qazaqstanda – 75 jas», - dedi ol.
Ortalyqtarda bilim berý, saýyqtyrý, bos ýaqytyn ótkizý is-sharalary tegin kórsetiledi, al bilikti mamandar qarttarǵa barlyq kezeńderde kómek kórsetedi.
Qarttarǵa keńinen kórsetiletin qyzmetter arasynda gerıatr, gerontolog dárigerlerdiń, psıholog mamandardyń kómegi bar, emdik dene shynyqtyrý, aıkýne gımnastıkasy, ıoga, kınezıologıa, skandınavıalyq júris syndy qyzmetter kórsetiledi. Sondaı-aq, klasıkalyq jáne zamanaýı bı, ıntellektýaldy oıyndardan – shahmat, toǵyzqumalaq bar, sýret, grafıka, qol eńbegi, IT saýattylyq, vokal, hor jáne t.b.qatysyp, ýaqytty tıimdi ótkizýge bolady.
«Sonymen qatar, kópshiligi aǵylshyn jáne qazaq tilin úırenedi, bı jáne mýzykalyq ansámblder de qurylǵan. Zeınetkerlerdi kóbi memlekettik elektrondy qyzmet túrlerin meńgergisi keledi, ol úshin smartfon jáne kompúterlik saýattylyq kýrstary qarastyrylǵan. Densaýlyqty dári-dárimeksiz nyǵaıtý boıynsha sabaqtar da suranysqa ıe bolyp shyqty, olardyń barysynda zeınetkerlerge durys tamaqtanýdy uıymdastyrý, dıetologıa jáne nýtrısıologıa negizderi, búdjetti rasıonaldy qurýboıynsha áleýmettik-ekonomıkalyq jáne zańdy keńester berilgen», - dep bólisti spıker.
Ortalyqta júzege asyrylyp jatqan biregeı ári qyzyqty jobalardyń biri – agrokraýdsorsıng. Bıyl oǵan qatysýǵa 80 adam ótinish bildirgen jáne óz ýchaskelerin alǵan.
«Almaty oblysyndaǵy 29 gektar jer ýchaskesinde bizdiń zeınetkerler jemis-jıdek pen baý-baqsha ósiredi, aýylsharýashylyq eńbegine tartylǵan, osy arqyly tabıǵatta dem alyp, densaýlyqtaryn nyǵaıtý múmkindigine ıe bolady. Qarttarǵa olardy nemereleri de kómektesedi, olar egindi birge sýaryp, kútip-baptaıdy. Qysqyǵa qamdaryn da jasaıdy. Al qalǵan ónimdi «Baqytty otbasy» ortalyqtaryna qatysýshy kóp balaly analar ashqan áleýmettik dúkender arqyly satady», - dedi S.Beketaeva.
Belsendi uzaq ómir súrý ortalyqtaryna barý arqyly qart adamdar ózderimen qyzyǵýshylyqtary bir adamdardy tabady, tipti otbasyn quratynda da kezdesip jatady.