Almatyda ótip jatqan referendýmda ómir kórgen, qazynaly qarttarymyz saıası naýqanda belsendilik tanytyp, óz daýystaryn berip jatyr.
Elimizde 90-nan asqan, 100-ge kelgen qarıalarymyzǵa úıde daýys berý múmkindigi jasalǵanyna qaramastan, saılaý ýchaskelerine arnaıy kelip, búletendi ózderi toltyryp, jáshikke ózderi salyp jatqan qarıalarymyz da az emes.
Solardyń biri – Almaly aýdanyndaǵy №86 saılaý ýchaskesine kelgen, 1934 jyly týǵan Ábilákim Aýbakırov.
90 jastaǵy aqsaqal ómiriniń sanaly ǵumyrynda barlyq saıası naýqandarǵa belsendi atsalysyp kele jatyr. Búgin de sol ádetinen jańylmaı, ózi tirkelgen №86 saılaý ýchaskesine jubaıymen birge keldi. Ábilákim ata kezinde Dinmuhammed Qonaevpen birge qyzmet etip, el múddesi úshin talaı ıgi isterge atsalysqan.
– Dımash atalaryńmen birge 15 jyldaı qyzmettes boldym. Ult múddesin qorǵaýǵa kelgende eshkimge ese jibermegen sol tulǵany ómirimniń úlgisi sanaımyn. Sender de adal bolyńdar! Ultqa adal qyzmet etińder! Eńbekteriń jemisti, ómirleriń kelisti bolsyn! – dep, Ábilákim ata saılaý ýchaskesinde qyzmet etip júrgen jandar men daýys berýge kelgen turǵyndarǵa aq batasyn berdi. Sonymen qatar, ol almatylyqtardy el bolashaǵyna beı-jaı qaramaı, osy mańyzdy naýqanǵa belsendi atsalysýǵa shaqyrdy.