Almatyda Qala kúni qarsańyndaǵy tazalyq aptalyǵy aıasynda aýqymdy tazalyq jumystary júrgizildi, dep habarlaıdy aqshamnews.kz
Qyrkúıektiń úshinshi jeksenbisinde atap ótiletin Qala kúni qarsańynda, 9 qyrkúıekte tazalyq aptalyǵy bastaldy. Jalpy respýblıkalyq «Taza Qazaqstan» baǵdarlamasy aıasynda qoǵamdyq oryndarda, kóshelerdegi qoqys jáshikteri men aryq júıelerinde aýqymdy tazalyq jumystary uıymdastyryldy. Maqsat – megapolısti taza, jaıly ári tartymdy etý.
Nebári bes kún ishinde arnaıy tehnıkanyń kómegimen kóshe-jol jelisinen 1000 m³-tan astam qoqys shyǵaryldy, onyń ishinde aryq jelilerinen 365,2 m³ qoqys jınaldy.
Sanıtarlyq tazalyq jalpy aýdany 25,1 mln m² jáne uzyndyǵy 2 777 km bolatyn 2 318 kósheni qamtydy. Kóshe-jol jelisin tazalaý jumystary 12 merdiger uıymnyń kúshimen júzege asyrylýda. Búgingi kúni qalada 1000-nan astam arnaıy tehnıka men 1300-ge jýyq jumysshy jumyldyrylǵan. Kúndizgi ýaqytta kóshelerdi tazalaýǵa kún saıyn 700 tehnıka jáne shamamen 1000 jumysshy shyǵady. Túngi aýysymda shamamen 220 tehnıka jáne 250 jumysshy jumys isteıdi.
Uzyndyǵy 1525 km qalanyń aryq jelisin tazartýǵa erekshe nazar aýdarylady. Kún saıyn aryq jelisinen shamamen 160 m³ laı men qoqys shyǵarylady. Shyǵarylatyn qaldyqtardyń basym bóligi plasıkten turady. Erigen jáne nóser sýynyń kedergisiz aǵyp ketýi úshin aryq jelilerin tazalaýǵa kún saıyn 80 birlik tehnıka men 320 jumysshy jumyldyrylady.
Qala boıynsha táýligine orta eseppen 520 m³ qoqys pen qaldyq shyǵarylady, onyń ishinde 100 m³-ke jýyǵy plasık. Magıstraldyq kósheler kúnine eki ret, al aýdandyq mańyzy bar kósheler kúndelikti tazartylady. Avtobýs aıaldamalary, qoqys jáshikteri men oryndyqtar jýylyp jatyr. Sondaı-aq, jol boıy men qoǵamdyq oryndarda jerge túsken japyraqtar jınalyp, shyǵarylady.
Degenmen, qaladaǵy tazalyqty saqtaý sharalaryna qaramastan, lastanýǵa baılanysty máseleler týyndap otyr. Aryqtar áli de turǵyndar tastaıtyn kezdeısoq qoqystarmen bitelip, qatty jaýyn-shashyn kezinde sý basýǵa ákeledi. Tazalyqty saqtaý – azamattyq jaýapkershiliktiń belgisi. Qalamyzdyń turǵyndary men qonaqtaryn qoqys tastamaýǵa, ásirese aryqtarǵa qoqys laqtyrmaýǵa jáne tazalyqty saqtaýǵa shaqyramyz.
Eske sala ketsek, bıyl Almatyda Qala kúni balalar men eresekterge arnalǵan 150-den astam túrli formattaǵy is-sharalarmen atap ótiledi.