Megapolıstiń eki mıllıonynshy turǵyny Aıala Jambyldyń otbasy qonys toıyn toılaıdy. Qala kúni olarǵa Almaty qalasynyń ákimi Baqytjan Saǵyntaev jańa páterdiń kiltin tapsyrdy dep habarlaıdy almaty-akshamy.kz
Eske salsaq, Aıala Jambyl 2021 jyly 21 maýsymda dúnıege keldi jáne Ulttyq statısıka búrosynyń málimeti boıynsha eki mıllıonynshy turǵyn boldy. Mereke kúni qala ákimi Baqytjan Saǵyntaev Aıalanyń ata-anasyna úsh bólmeli jańa páterdiń kiltin tapsyrdy. Qala ákimi balalar men ata-analarǵa zor densaýlyq, otbasyna baqyt pen bereke tiledi.
Qala kúni alty bala ósip kele jatqan Jambyl otbasy úshin qýanyshty kúnge aınaldy. Jergilikti atqarýshy organdardyń qoldaýynyń arqasynda kópbalaly otbasynyń jeke baspana týraly armany oryndaldy. Endi olar jaıly jańa úıde turatyn bolady.
Eki mıllıonynshy almatylyq Aıala Jambyl polısıa qyzmetkeri Beıbit Ábildaev pen balabaqsha tárbıeshisi Álıa Janybekovanyń otbasynda dúnıege keldi. Ol otbasyndaǵy altynshy qyz. Buǵan deıin kópbalaly otbasy Qarǵaly shaǵynaýdanynda ata-anasynyń úıinde turǵan.
«Ana retinde balalarymnyń týǵan kúnderi eń baqytty sát bolsa, al búgin páter kiltin alý eshqashan umytylmaıtyn eń baqytty kún. Biz qaladan mundaı syılyq alamyz dep kútpegen edik», - dedi Álıa Janybekova emosıalarymen bólisti.
Almatyda jyl basynan beri kómekke muqtaj 2 340 otbasy jeńildetilgen nesıe aıasynda turǵyn úımen qamtamasyz etildi.