Búdjettiń jartysynan astamy áleýmettik shyǵyndarǵa jumsalady.
Almaty qalasy Máslıhatynyń VIII shaqyrylymynyń kezekten tys II sesıasy ótti. Oǵan qala ákimi Erbolat Dosaev qatysty, dep habarlaıdy Almaty-akshamy.kz
Qala basshysy depýttarǵa qarata aıtqan sózinde "siz ben bizdiń basty maqsatymyz – árbir almatylyqtyń ál-aýqatynyń artýyn qamtamasyz etý úshin qalamyzdy úılesimdi damytý" ekenin atap ótti.
«18 jylda alǵash ret ashyq jáne básekeli saılaý ótti, onyń qorytyndysynda Almaty qalasy máslıhatynyń jartysy nemese 21 depýtat bir mandatty okrýgter boıynsha saılandy. Jalpy, máslıhattyń depýtattyq korpýsy 67%-ǵa jańardy. Almatynyń aldynda turǵan zamanaýı syn-qaterler men aýqymdy mindetterdi nazarǵa ala otyryp, óken jyldyń qyrkúıek aıynda máslıhat 7 basym baǵyttan turatyn «Almaty qalasyn damytýdyń 2025 jylǵa deıingi baǵdarlamasyn jáne 2030 jylǵa deıingi orta merzimdi perspektıvalardy» qoldap, bekitti», - dedi E.Dosaev.
Bekitilgen Damý baǵdarlamasyn jáne Memleket basshysynyń 2022 jyldyń qarashasynda ótken Almaty qalasyn damytý jónindegi keńeste bergen tapsyrmalaryn oıdaǵydaı oryndaý úshin depýtattardyń qaraýyna eki mańyzdy másele shyǵaryldy:
1) Almaty qalasynyń 2023 jylǵa arnalǵan búdjetin naqtylaý;
2) Almaty qalasynyń 2040 jylǵa deıingi Bas josparynyń jobasy.
2023-2025 jyldarǵa arnalǵan qala búdjeti Almaty qalasyn damytý baǵdarlamasynyń negizgi basymdyqtary negizinde qalyptastyryldy.
Osy jyldyń İ toqsanynda ekonomıkanyń qarqyndy damýy búdjetti naqtylaýǵa negiz boldy. Qysqa merzimdi ekonomıkalyq ındıkator 23,9%-ke ósti. Saýda (+29,4%), óńdeý ónerkásibi (+24,5%), kólik (+21,8%) salalary ekonomıka ósiminiń draıverleri boldy. Ekonomıkanyń damı túsýi memlekettik búdjetke túsetin túsimderdi 32,1%-ke arttyrdy (barlyǵy 1 241,1 mlrd.teńge salyq jáne mindetti tólemder (132,1%), onyń ishinde respýblıkalyq búdjet - 941,8 mlrd. teńge (139,3%), jergilikti búdjet – 299,3 mlrd. teńge (133,5%).
«Sizderge búdjetti naqtylaýǵa usynylǵan 265,4 mlrd. teńge osy jyldyń İ toqsanyndaǵy qosymsha kiristi qalyptastyrý, búdjet qarajatyn ishteı qaıta bólý jáne ótken jyldyń bos qaldyqtary esebinen júrgizilýde. Qosymsha qarajat negizinen kólik ınfraqurylymyn qalyptastyrýǵa, turǵyn úı-kommýnaldyq sharýashylyq ınfraqurylymyn modernızasıalaýǵa, áleýmettik qamtýǵa, bilim berý men densaýlyq saqtaýdy damytýǵa, qalany abattandyrýǵa jáne kógaldandyrýǵa baǵyttalatyn bolady. Jedel sheshimder qabyldap, olardy naqty iske asyrý basty mindetimiz bolyp tabylady, sonda biz alǵa qoıǵan maqsattarǵa qol jetkize alamyz», - dedi qala basshysy.
Ákimdiktiń bastamasymen jáne Memleket basshysynyń qoldaýynyń arqasynda 1 sáýirden bastap aýdandyq ákimdikterge qalalyq deńgeıden qosymsha 15 fýnksıa berildi. Osy oraıda, ókilettikterdi ortalyqsyzdandyrý sheńberinde jáne aǵymdaǵy naqtylaýdy eskere otyryp, 8 aýdandyq ákimdiktiń 2023 jylǵa arnalǵan búdjetteri 60,4-ten 164,5 mlrd. teńgege deıin 2,7 ese kóbeıedi. Budan basqa aýdan ákimdikteriniń shtat sany 152 birlikke ulǵaıdy, onyń ishinde jańasy – 56, 96-y qalalyq basqarmalardan berildi.
Qala ákiminiń sózinshe, osy sharalardyń arqasynda aýdan ákimdikterinde jańa múmkindikter men qosymsha qarjy resýrstary paıda bolady, sheshimder qabyldaý jyldamdyǵy men sapasy jaqsarady ári aýdan ákimderiniń halyq aldyndaǵy jaýapkershiligi artady.
Sonymen qatar, depýtattardyń qaraýyna Almatynyń odan ári damýy úshin óte mańyzdy bazalyq qujat – qalanyń 2040 jylǵa deıingi jańa Bas jospary usynyldy. Bas jospardyń jańa jobasy qańtar aıynda alǵash ret úlken qoǵamdyq talqylaýdan ótti, onyń barysynda qala turǵyndarynan, qoǵamdyq uıymdar men sarapshylar qaýymdastyǵynan 1300-den astam komentarı alyndy, olar negizinen jaıly qalalyq ortany qalyptastyrý, ekologıany jaqsartý jáne qaýipsizdikti qamtamasyz etý máselelerine qatysty boldy. Sonymen qosa máslıhat komısıalarynyń otyrystarynda osy jobada eskerilgen 20-ǵa jýyq usynys alyndy.
«Ózderińiz biletindeı, qalanyń Bas jospary 20 jyl buryn ázirlengen jáne monoortalyqtyq damý modeline negizdelgen, ıaǵnı jumys oryndary men áleýmettik-mádenı qyzmetter qalanyń tarıhı ortalyǵyna tyǵyz shoǵyrlanǵan. Sodan beri qala aýmaǵy jaǵynan da, halyq sany boıynsha da 2 ese ulǵaıdy», - dedi qala ákimi Erbolat Dosaev.
Jańa Bas josparda turǵyn úı, áleýmettik, kólik jáne ınjenerlik ınfraqurylymy damyǵan 5 jańa polıortalyq qurylatyn polıortalyqtyq damý modeline kóshý kózdeledi. Bul osy polıortalyqtardyń turǵyndary úshin barlyq qajetti ıgilikterdiń jaqyn ornalasýyna múmkindik beredi.
Almaty ákimi E.Dosaev jańa Bas jospar jaıly qalalyq orta qurý jáne qalamyzdyń barlyq aýdandarynda ómir súrý sapasyn jaqsartý úshin berik negiz qalaıtynyna senim bildirip, qalanyń kórkeıýi úshin barshasyna nátıjeli eńbek etýge shaqyrdy.