Elimizde qyzylshaǵa shaldyqqandardyń sany 180-nen asyp ketti.
Soǵan qaramastan, 2 myńnan astam ata-ana balalaryna juqpaly aýrýǵa qarsy ekpe saldyrtýdan bas tartyp otyr. Dárigerler munyń sońy qaıǵyly oqıǵaǵa ákep soqtyrýy múmkin dep dabyl qaǵýda. Óıtkeni balalar arasynda A gapatıtin juqtyrý jıilegen, dep habarlaıdy Almaty-akshamy.kz Qazaqstan.tv saıtyna silteme jasap.
Jaqsylyq Baıshyǵashev balasyna ekpe saldyrýǵa áýelde qarsy bolǵan. Ol preparattyń paıdasyna kúmánmen qaraǵanyn aıtady. Bir jarym jasynda salynýy kerek vaksınany uly ekige tolǵanda bir-aq alyp otyr.
«Kóbi aýyryp jatyr deıdi. Sondyqtan biz de vaksına alýǵa keldik. Buny almasa taǵy bolmaıdy», - deıdi qala turǵyny Jaqsylyq Baıshyǵashev.
Naýryz aıynyń orta tusynda tarala bastaǵan juqpaly aýrýǵa shaldyqqandardyń deni - Almaty turǵyndary. Qalalyq densaýlyq saqtaý basqarmasy bergen málimetke súıensek, 26 adam qazir aýrýhanalarda em qabyldap jatyr.
«Aýrýhanalarda stasıonarlyq em qabyldap jatqan 7 eresek jáne 19 bala bar. Barlyǵynyń jaǵdaıy turaqty. Aýyr naýqastar jáne júkti áıelder tirkelgen joq», - deıdi qalalyq densaýlyq saqtaý basqarmasy epıdemıologıa bólimi basshysynyń mindetin atqarýshy Mıras Shadman.
Naqtylasaq, qyzylsha juqtyrǵan almatylyqtardyń 80 paıyzy - 14 jasqa deıingi balalar. Osyny negizge alǵan dárigerler megapolıste vaksına alýy kerek 8 myń bala merziminen keshigip jatqanyna alańdaýly. Qazir memlekettik jáne jekemenshik emhanalarda tegin ekpe salý jumystary júrip jatyr. Biraq ata-analardyń basym bóligi vaksınadan úzildi-kesildi bas tartyp otyr. Mamandardyń aıtýynsha, áli kúnge deıin qyzylsha aýrýynyń naqty bir emi tabylmaǵan. Al, ekpe syrqattyń aldyn alýǵa járdemdesedi deıdi aq halattylar.
Qyzylshaǵa qarsy salynatyn vaksınanyń mólsheri - 0,5 ml. Ol temperatýrasy +2 men +8 gradýsty quraıtyn arnaıy tońazytqyshtarda saqtalady. Bunyń ereksheligi ekpeni alǵan balanyń boıynda qyzylshadan bólek, qyzamyqqa jáne paratıt vırýsyna qarsy ómirlik ımýnıtet qalyptasady.
Sondyqtan vaksına almaǵandar qyzylsha juqtyrsa, arty kóp jaǵdaıda asqynýlarǵa alyp keledi.
«Egilmegen balalarda ınfeksıa aýyr túrde, kóp jaǵdaıda asqynýlarǵa alyp keledi. Pnevmonıa – ókpeniń qabynýy, vırýstyq qabyný emi joq. Kóp jaǵdaıda ólim-jitimge ákep jatady. Balalarda ǵana emes eresek adamdar arasynda. Odan basqa kózdiń qabynýy kezinde adam ómir boıyna soqyr bolyp qalýy múmkin. Sol sıaqty mıdyń qabynýy», - deıdi QR DSM sanıtarıalyq-epıdemıologıalyq baqylaý komıtetiniń basqarma basshysy Nurshaı Ázimbaeva.
Qyzylsha - jyl saıyn taralatyn aýrý. Degenmen byltyr elde atalǵan vırýsty juqtyrǵan 4-aq adam tirkelgen bolsa, bıyl syrqattanǵandar sany 187-ge jetti.